Shillong, Oct 07: Dingtang dingtang man·na nanggnirangko sorkario dabie jingjengatenggipa skigipa dolni kosako chelchakgiparangni tear gas-rangko goani ja·man, BJP-ni MLA Pa AL Hek, mija Bristibara salo a·dokni Home minister Pa Lakhmen Rymbui-ko kam watchina aganangaha.

Skigiparang, ua somoio an·tangtangni man·gninasa maming golmalko ka·gija tom·tome jingjengattokengachim aro darangni kosakoba uamang ong·gijako dakna miksonggipaba ong·jachim indiba bi·sa-desa aro me·chik skigiparang gimik dongpaengon uamangni kosako tear gas-rangko godapanira namen ka·saninggijani kam ong·chongmota ine Pa Hek parakataha.

Ia ong·gijagipa kamko ka·anina home minsiter kamtangko watna nanga ine doltangoniba aganaha, uni gimin ka·saninggija dakanio kamtangko watchina gita home minister-ko  angaba mol·molpana nangnika ine Pa Hek aganangkuaha.

Indake ong·engon, home minister-ni kamtangko wate on·jagenchimoba BJP dolni sorkari baksa bakrimani dingtangkujawa aro uamangni gisepo jekon skango tik ka·grikahachim uan ong·angkuaigen ineba Pa Hek aganchakangaha.