Tura, Feb 13: Re·baenggipa 27 tariko Meghalaya Legislative Assembly-na memborrangko a·doko seoktainasiengahani gimin, NPP dolni skotong dilgipa aro a·dokni skotong minister Pa Conrad K Sangma, Sombar saloni gnigipa bako eleksinna wenaniko dakna gita a·bachengtaiaha.
Chopper-o bilbae campain-rangko ka·anganio, skotong minister, skanggipao 48-Selsella constituency-ni ning·ogipa Narangbari-o manderangna aganprakangaha, jeni ja·man, 53-Chokpot constituency-ni ning·ogipa Chokpot songonaba wenbae manderangna aganprakangaha.
Pa Conrad Sangma an·tangan, batanggimin 2008 bilsio Selsella constituency-o chakate manderangchi seokaniko man·ahachim aro ua somoio a·dokni dambebatsranggipa finance minister-ba ong·angaha.
Tom·anio, NPP dolna chakpachina gita dolni candidate-na campaign-ko ka·chakanganio jinmana aganprakangengon, Selsella song pangnan uni ka·tongo dongkamjringgen ine aganangenba, a·jani manderang, politics-ni gimin angna skie on·aha aro Selsella-oni seokaniko man·chengesa politics-ni gimin bang·en skie ra·na aro ma·sidape ra·na cholrangko man·aha ine skotong minister parakataha.
NPP is nothing without its people. Thank everyone who came out in support of our candidate for Selsella Constituency, Sh. Arbinstone Marak at Narangbari today. NPP will continue working actively for the Constituency through its young and capable candidate.
NPP for Selsella! pic.twitter.com/sCNIv4eIcL
— Conrad K Sangma (@SangmaConrad) February 13, 2023
Ianpako a·jaoni MLA-na susaenggipa Pa Arbinstone Marak-ko songoni mandean ong·a aro a·jao pilakni gita neng·nikanirangko nambate ma·sipa ong·eming a·jatangni manderangni ku·rangrangko kosakchina sokatna bil gnangbatgipa ong·gen ine parakatenba, re·baenggipa eleksino ku·cholsan ong·e una vote-rangko on·china gita skotong minister, a·jani manderangko mol·molangaha.
Da·o MLA ong·enggipani kosako Pa Arbingstone Marak-ko baseanian una chakgrimna nangnikaniko janape manderangni uko de·e-minge ra·baani giminsa ong·a ine janapangkua baksana, re·baenggipa changoban NPP-an sorkariko riktaina tariaha ine parakatenba, sorkario ong·gijagipa gipin political dolni candidate-rangko seokede namgni dongjawa ineba Pa Conrad Sangma agandapataha.
“Meghalaya-o political-ni balwarang da·alo namen dingtangengaha, maina Khasi aro Jaintia a·jani manderang NPP dolko bilakbatatna gita ku·cholsan ong·tokengaha, uni gimin, ianpakoba NPP dol bang·bata seat-rangkon chena gita ka·donga,” ine NPP-ni skotong dilgipa aganangaha.
