Kharkutta, Feb 22: Kharkutta-ni MLA Pa Rupert Momin-ni dongpaanio, North Garo Hills District-ni United Kharkutta Higher Secondary School-ko namdapatanina pangchakaniko da·al Sombar salo a·dokni skotong minister Pa Conrad K Sangma songe on·angaha.
Kharkutta, Melopara, Tengabari, Salpara, Kholaipara aro Kamagandim song dam 6-rangni gisiko nange kamrangko ka·achi 1953 bilsi jolo a·bachengatgipa skulko, 1959 bilsio deficit system-ni ning·o ra·baaha aro 1981 bilsio uko jako ra·e 2002 bilsio ua skulko higher secondary-ni gadangona ra·doataha. A·jao songdonge poraigiparangni nangnikaniko chu·sokatna mongsong nangchongmotgiparang chu·onge dongja baksana ua skulni obosta da·o namen namsrangjabataha.
Ua skulko namdapatna pangchakaniko songe on·angao aganengon, da·o sorkariko rikenggipa skia-porani a·bana mongsong gisik on·batenga ine agane, “skia-porana mongsong nangchongmotgiparangko namdapatna ja·ku de·anichi a·jao poraienggipa chatro-chatrirangna mikkangchi skie ra·na gita namgipa cholrang ong·gen, ine skotong minister parakataha.
Manderangni nangnikanirangko ma·sie, MDA sorkarini on·kange kamko ka·engani gimin agan-janapanio, “NPP dol, eleksinni somoio manderangni mikkango ku·rachakaha aro uarangko chu·sokate on·na gita, sasonni bilko jako ra·chakatani jadokrangni gisepon ia sorkari, ‘Education Policy’-ko ra·baaha ine ua aganangaha.
Ia skulko a·bachengate on·anggipani gimin aganengon, “song dam 6-ni dilgiparangni ku·mongrime kam ka·achi ia skulko 1953 jolo be·en pil·ataoni intalan songni-nokni manderangna bilsi 68-rangna kingking namgniko on·e dakchakaha. Indaka cholko man·na kragipa songni-nokni manderangni namgnina ia project-ko a·bachengate on·aniko parakatna gita anga da·alo namen kusi ong·a ine parakatan baksa, tangka gong kror 4-chi ua skulko namdapatna kamrangko ka·anio man·adipet re·baenggipa 2022 bilsini December jana skangan matchotatchinaba skulko chu·gimik daito ra·e nirokatgiparangkoba skotong minister didiangjolaha.
A·jao songdonggipa chatro-chatrirangni poraichakram biapko mikkangchi namdapatna miksonge gital skul nokko rikchakatna tangka-paisako chamchina a·dok sorkarini do·gako doktike iako jinma chanchiaona ra·baani gimin skotong minister, Kharkutta-ni MLA Pa Rupert Momin-koba mittelpilangaha.
