Shillong, Sept 30: Jolni MLA-rang Pa Gigur Myrthong aro Pa McMillan Byrsat-maang, district administration-ni niksenggipa dilgiparang aro officialrang gimikni dongpaanio, Meghalaya-ni skotong minsiter Pa Conrad K Sangma, West Khasi Hills, Maweit-o tom·aniko ong·atanggipao Nongstoin-oni Maweit-ona dakanggipa ramako taridapna Sukrobar salo pangchakaniko songe on·angaha.
The MDA Government has taken up many infrastructure works in West Khasi Hills District. Through this road we are fulfilling yet another promise to the people.
I have instructed the officials to start this work soon. May this road bring many more blessings to the people. pic.twitter.com/dY0CxwlR6f
— Conrad Sangma (@SangmaConrad) September 30, 2022
Chu·gimik km 23-mang ong·gipa ramako, World Bank-ni tangka-paisako on·e dakchakachi Meghalaya Integrated Transport (MITP)ni ning·o taridape on·anggen.
Ia project-o napgipa ramani a·bachenggipa bakara Riangdo-oni Shillong-ona dakanggipa ramani junction-oni ong·a, indake Nongpyndeng, Mawlait, Nongthraw, Wahlyngoh, Nonsgbah, Mawdong aro Miangshang songrangko nape Nonghyllam-oni Maweit ona dakanggipa ramani skanggipa dolongko man·chenggipao bon·ea.
Ua ramana proposal-rangko on·anggipao, da·o manderangni jakkalenggipa ramako taridapani aro apalbatataniko man·chapa aro gong kror 98 mangna baten ia project-na tender-ko on·angaha aro pilak kamrangko matchotatna ja 36-na somoiko on·aha.
Ramana pangchakaniko songe on·angani somoio jinmana aganprakangengon, ru·uta bilsirangna kingking a·jako galchipaha ine aganatenba, manderangni ru·uta bilsirangoni nangnikenggipa ramako changsatai sorkarini chu·sokate on·na gita man·anina skotong minister an·tangni kusi ong·anikoba parakataha.
“Manderangna namen nangchongmotgipa ramako taridapna pangchakaniko songe on·na man·ani gimin angni gisiko chu·onganiko aro kusinirangko man·a’, ine aganatan baksa, namgipa ramarang dongna nangani gimin aganangengon, ramarangni namosa pilakni gita namroro-silrorona gita man·a aro manderangni janggi tangani gadangrangko tang·doatna namgipa cholba ong·a ine skotong minister parakataha.
“Sorkari ong·e, a·dokni biap damantichin namgipa rama-jal·langrangko on·na man·na gita chinga ong·kangenga, maina a·dokko mikkangchi silroro-namroroatnade namgipa rama-jal·langrang dongaosa pangchaka. Ramarang namosa minggipin namroro-silroroanirangde sokbagen,” ine Pa Sangma aganangaha.
Rama-jal·langrangko namdapatani project-rangna a·dok sorkari gisiko nangbate kamrangko ka·atenga, indake West Khasi Hills a·jana aro a·dok gimikna man·gope rama-jal·langrangko namdapatna gita tangka-paisarangko bang·baten botaha ineba Pa Sangma aganangkuaha.
“Ritchani-ritcha aro hajal krorrangni gita gamchatgipa rama-jal·langrangko West Khasi Hills a·jao tarie on·aha. Ru·uta bilsirangna kingking, PMGSY aro National Highway-rangni ning·o bang·a galchipgimin ramarangko sorkari taridape on·aha. Iana bang·bate tangka-paisako chamatanian CRF aro RIDF aro a·dokni gipin scheme-rangni gita ong·aha,” ineba skotong minister agandapataha.
Uandake, a·jani manderangni namgnina ia project-ko man·bana gita gisiko nange kamrangko ka·anina a·joltangni MLA Pa Gigur Myrthong-koba skotong minister de·mittele aganangaha.
Minggipin a·bao a·jani manderangni dabianiko aro nangnikanirangko niatenba, Maweit PHC ko CHC-ona ra·doatchina dabianianikoba niatjolna gita skotong minsiter manderangna ka·dongataniko on·enba, namgipa sanchakram biaprang a·jao dongna nangani gimin ua iako jako ra·enggipa MLA aro health minister baksa agan-chanchirime kamrangko gong·rakatna jotton ka·gen ineba ua u·iatangjolaha.
