Shillong, Dec 20: Joltangni MLA Gigur Myrthong-ni dongpaanio, West Khasi Hills a·jani ning·o gital Shallang C&RD Block-ko Meghalaya-ni skotong minister Pa Conrad K Sangma, Mongolbar salo songe on·angaha.
Block-ko songe on·angani somoio, dingtang dingtang u·iatanirangko see on·anirangkoba skotong minster, gital BDO-ni jako on·angjolaha.
Gital Shallang block-ko songe on·anganio skotong minsiter-ni jinmana aganprakanganio, a·dokni manderangni janggi tanganio bang·a namgnirangko ra·bana gita MDA sorkari dingtang dingtang dakgipa program-rangko a·bachengate on·aha ine aganatan baksa, manderangna sorkarini pilak kamrangko sokatna man·na gita nangnike ia sorkari kamko ka·enga ineba Pa Sangma aganprakataha.
Batanggimin baditaba bilsirangonin West Khasi Hills a·ja namen nichanggalako man·aha, indiba NPP-chi rikdilenggipa MDA sorkari, a·jao bang·a namroro-silroroaniko ra·bana gita dingtang dingtang namroro-silroroatani programme-rangko ra·gate on·aha ineba skotong minister agandapataha.
Unomiting, tom·ao bakko ra·e joltangni MLA Gigur Myrthrong, Shallang-o gital C&RD Block-ko songe on·na gita gisiko nanganina a·dokni skotong ministerko dingtangmancha de·mittele aganangengon, a·dokni dingtang dingtang bakrangnaba apsan gisik on·e kamrangko ka·atenganinaba skotong minster Pa Conrad K Sangma-ko mittelangjolaha.
Ia programo skotong minister, Focus plus-ni card-rangko a·jani ning·o donggipa pilak game-ge·e cha·giparangni jako pakwate on·anga baksana, Progress scheme-ni ning·o wak bi·sa aro Kuroiler do·orangkoba manderangna suale on·angjolaha.
