Tura, July 21: Garo Hills gimiko gitchambatgipa West Garo Hills-ni ge·sa cha bijakni karkana – Arengh Industries-china re·ange nirokean baksana, Meghalaya-ni skotong minister Pa Conrad K Sangma, Butbar salo cha bagano kam ka·enggiparangkoba grongjole uamang baksa agangrikangaha.
Arengh Tea Manufacturing Unit-o kam ka·gipa manderangko rakkiani ning·o, gimik sak 300 na bata gamgipa-ge·giparang aro sak 4000 mangni gita kam ka·giparang gnang.
Unbaksana, Bakdil-ni niroke chalaienggipa aro ua jolo nambatsranggipa sanchakram biap Babadam, PHC-chiba skotong minister re·ange nirokangjolaha. Ia sanram biapara, ma·giparangni detangtangko atchichakatanio 90 percent chu·sokgipa ong·an baksana bi·sa chonchongiparangko tika su·anirangoba 100% chu·sokgipa ong·e namgipa bimingko man·pilgipa ong·a. Ia PHC-on ge 47 na bata songrangko man·gope pilak sana-bananirangko on·enga.
Apsan salon skotong minister, Rongram block-ni ning·ogipa Jongdikgre songona re·ange uanoni game-ge·e biterangko ong·katatenggipa manderangko aro gama-ge·achi an·tangari chonchone bading-chiwalaniko dakenggiparangkoba gronge agangrikangaha. Ua songona re·angao, game-ge·e man·gipa biterangko ong·katatenggipa adita sak manderang aro Chidilsa Piggery Cooperative Society-ni manderangni chagrongenggipa neng·nikanirangni bidingo skotong minister uamang baksa agan-golpogrikangaha.
Ua somoion skotong minister, Prime Hub scheme-ni ning·o cheque-rang aro treadle pump-koba uamangna sualbajolaha.
Iarangna agreba, ia apsan salon bimang ong·nasienggipa Tribal Research Institute -ko Babadam-o da·o rikatenggipani kamrangkoba nirokeaha. Ministry of Tribal Affairs-ni chamatgipa tangka-paisachi rikatenggipa mikkim gnangbegipa Tribal Research Institute-ko jensomoio bimang ong·atna man·ahaon salgro-salaramni dingtang dingtang jatrangni gimin sandie aro ma·sie ra·chakna ian mongsonggipa biap ong·gen.
West Garo Hills-ni skotong Tura songjinmaona salgimik somoiko ra·e wenbaanio a·dokni skotong minister, Tura, Dakopgre-o donggipa niksenggipa PA Sangma Stadium-onaba re·bae pilak rikatani kamrangkoba nirokangjolaha.
