Shillong, May 1: Sohiong Assembly election-ko re•baenggipa May 10 tariko ong•atna siengon, Sombar salo, Meghalaya a•dokni Chief Minister aro National People’s Party (NPP)-ni national president Conrad K Sangma, NPP-ni candidate Samlin Malngiang-na campaign ka•angaha.
Ia tom•bimonganio ua Sohiong constituency-ni manderangna aganprakangengon, National Green Tribunal (NGT)-ni gita a•doko niam gri koela bikotaniko champengatahani gimin niamo pangchake koela bikotaniko a•bachengpiltaina uni sorkari rakbee kamrangko ka•aha aro 2019 bilsio case-ko file ka•ani ja•man, NGT-ni champengataniko Supreme Court ra•galatpilaha ine parakataha. Koela bikotgipa mande sakbrini mining lease-rangko India sorkari ra•chakmanaha aro niamo pangchake koelarangko bikotna gita lekkani kamrangko da•o sal 60-ni gisepon matchotgnok ineba Sangma parakataha.
Gong crore 800-na batgipa Western bypass project-ni gimin janapatskaengon, ia project-ko NPP, jolo songdongenggipa manderangni janggi tanganiko dingtangatna gita a•bachengataha ine Chief Minister parakataha.
Sohiong constituency-o lekka pora aro an•seng baljokani kamrangko namdapatna gita sorkari kamko ka•gen ineba ua ku•rachakaniko on•angaha.
Sorkariko chalaianio tol•pinapgipa political dolrangni kamna suk ong•gijaniko parakatengon, mitam political dolrang, apsan kamrangko ka•rimeba election-ni somoirangode NPP-ni kosako matnangani kattarangko aganna jotton ka•enga indiba India a•songo songdongenggipa manderang, Khasi manderang aro A•chik manderangba, an•tangni cha•chakgipa talao maming saloba studapgiparang ong•ja ine Sangma, gisik ra•ataniko on•angaha.
Sohiong constituency-o dingtanganiko ra•bana gita NPP-ni candidate-ko seokchina didiangengon, NPP-sa sorkariko dilengani gimin gipin political dolrangna knachakede maming namgnirangko ra•bana man•jawa aro NPP-ko seokanichisan Sohiong constituency-o namroro silroroaniko ra•bana man•aigen ine NPP-ni national president parakataha.
