Shillong, May 2: Re•baenggipa May-ni 10 tariko ong•atenggipa Sohiong Assembly constituency-ni election-ko National People’s Party (NPP) chegen ine Meghalaya a•dokni Chief Minister aro NPP-ni national president, an•tangni ka•dongchakenganiko parakataha.

Sangma-ni parakatani gitade, ia election-na NPP, Sohiong constituency-ni pilak biaprangon rakbee kamrangko ka•soengahani gimin manderangni chakpaanirangko man•na ka•dongenga.

“National People’s Party-an sorkariko dilengani gimin Sohiong constituency-ba bang•a namgnirangko man•china gita Sohiong constituency-ni manderang sorkariko dilenggipa dolkon seokna nangniktokenga. Uni gimin ia pilakko nigope Sohiong election-ko NPP-an chegen ine chinga ka•dongsona man•enga,” ine a•dokni Chief Minister aro NPP-ni national president parakataha.

2018 bilsini Assembly election-oba Sohiong constituency-o da•o NPP-ni candidate ong•e susaenggipa Samlin Malngiang, 600-na batgipa vote-rangchi chegipa ong•ahachim ine nikna man•a.