Shillong, June 25: Gario ganasigipa manderang nikna man·na gita sajinmani tikako su·a ba su·gijaniko mikkango tape mesoka ong·ode re·baenggipa June 28 tarik, chong·motan Sombar saloni dipet Shillong songjinmao mande gate salruragipa gari-gorarangko 15 percent re·na on·na gita a·dok sorkari tik ka·angaha.
Iako, a·dokni skotong minister Pa Conrad K Sangma-ni dilanichi Sukrobar salo nipiltaiani tom·aniko dakanga ja·man Health Minister Pa AL Hek u·iataha.
“Sombar salonide, gari bus-rangko watchange, local taxi-rang aro auto rickshaw-rangko 15 percent-ona Shillong-o re·rurana gita on·gnok indiba tika su·a ba su·gijako mikkango see mesokna nangskagen,” ine Pa Hek koborna parakataha.
East Khasi Hills aro gipin district-rangni songadam biaprangchide 30 percent dipet re·rurana cholko on·gnok, indiba para salenggipa garirango tika su·manani certificate-rangko mesokna nangskagen ineba u·iataha.
Pa Hek-ni u·iatkuani gitade, a·dokni skotongo donggipa restaurant-rang aro hotel-rangko, noktangtangchina bree ra·angna aro nokrangona sokatangnade kulina on·gen ine talatan baksa, songadamrangoba cha dokanrangko kulina on·gen indiba dokan ning·o asonge ringna-cha·na man·jawa ine Pa Hek taldapataha.
Indake ong·engon, mande salruragipa garini nokgiparang aro gipin bading-chiwalgipa dokan nokgiparangni tika su·a ba su·gijanirangko nirokatanirang donggen ine Director of Health Services (MI) Dr Aman War, sing·anina aganchakaha.
“Maini gimin chinga manderangko tika su·china aganenga, ian tika su·ani ja·man virus-ko man·taioba tika su·gijagipa manderangona bate indita biljime saa donggijaniko chinga nikaha, uni giminsa an·tangtango tikako su·e ra·aniko chinga nangnikenga jedakode sana-bananirangoba bal-bojako ong·atjawa,” ineba Dr War agandapataha.
Sabisina nanggipa bosturangko, jerangkon da·omitingde noktango donge saako sanenggipa manderangnasan on·aiachim, uko a·dokni dingtang dingtang corona care centre-rango donge saako sanenggipa manderangnaba on·angna gita a·dok sorkari tik ka·aha ineba health minister parakataha.
