Shillong, Aug 31: A·dokni ge 600 Business Correspondent (BCs)rangna dakchakaniko on·na gita a·dokni skotong minister Pa Conrad K Sangma-ni dongpaanio, Meghalaya sorkarini Finance department aro Meghalaya Rural Bank (MRB)ni gisepgriko Brisitbar salo MoU-o soi ka·grikangaha.
Iana, Meghalaya sorkarini Finance department-ni pal ong·e Commissioner aro Secretary Dr. D. Vijay Kumar aro Meghalaya Rural Bank-ni Chairperson Tshering Deki, OIC NABARD-ni General Manager, Naingkhangvung Guite-maang MoU-o soi ka·angtokaha.
“Tangka-paisani bidingo ong·gipa pilak kamrangko man·chapatna a·dokni miksonganiko iachi chu·sokate on·na gita dakchakgnok, aro banking service-rangko man·pagijagipa biaprangoni tangka-paisani gita namgniko man·gnigiparangni bank account-rangona joljolan ma·mong sorkarini aroba a·dok sorkarini on·gnigipa tangkarangko chipatna gita namen dakchakbeani ong·gen,” ine skotong minister u·iataha.
MoU-o soi ka·anichi songadam aro namen chel·begipa biaprango tangka-paisarangko man·anio mongsong neng·nikanirangkoba namatna man·gnok. Bank-ni palo kamko ka·giparang, chong·motan Business Correspondent-rangna, BAKDIL ba MSRLS ba ICVS ba CSC-ni Business Correspondent Agent (BCAs)rang aro MRB-ni ge·gipin BC-rangni gita dakchakaniko on·angskagen.
Indake ong·engon, a·dok gimikchina ge 600 BC-rangko donatanio a·dok sorkari, MRB-na dakchakaniko on·gen. Indake, BC-rangna micro ATM-rangko on·gen aro ia micro ATM-rangara, mongsongbate banking service-rangko man·pagijagipa Village Employment Council (VECs)rang aro a·dok sorkarini ma·sie dongimin songrangoni tangka-paisani gita namgniko man·enggipa manderangni nokrangona sokate tangka-paisarangko bikote on·na gita dakchakaniko on·gen.
Songni manderangna account-rangko kullie on·anio aro gipin banking service-rangni gimin uamangna ma·siate on·anio BC-rangan pilak daitorangko jako ra·e kamko ka·anggen.
Iandakgipa cholko a·bachengate on·anichi, mongsongbate manderangni tangka chipani aro okanirangko chimongna, MGNREGA-o kam ka·giparangna, old age-ni pension-ni tangkako man·giparangna, PM KISAN-ni tangkako man·giparangna aro gipin customer-rangna songadam aro banking service-ko man·pagijagipa biaprango tangka-paisarangko gamanio namgnirangko on·gen.
