Shillong, June 14: Ia sal somoirango Meghalaya a·dokni songadam nokadamrangoba COVID-19-ko man·giparang batrorobaenga ine Sombar salo, Opposition dolni dilgipa Mukul Sangma, jajrengchakenganiko parakatenba, a·dok gimikon COVID-ko nambate warachakna gita ja·kuko de·china sorkariko didiataha.
Sombar salo Assembly Speaker-ni tom·aniko ong·atani bidingo janapatengon, iandakgipa tom·anirango sorkari, tarisamsoanirangkosan name talataigija COVID-ni batrikrikenganiko champengna ja·kurangko nambate de·na nanga ineba Sangma aganaha.
COVID-na kulienggipa ICU-rangko aro sorkarini bregimin ventilator-rangko ta·raken kamo jakkalchina gitaba Opposition dolni dilgipa, sorkariko didiangaha.
Sangma-ni aganani gitade, iandakgipa ostrorangko jakkalna changgipa manderang dongjagenchimode sorkari, training-rangko on·e ia ostrorangko ta·raken jakkalna nangengaha.
Meghalaya a·dokni a·ja damantion janggi jokatani bosturang donggipa ambulance-rangko donatchina gitaba opposition dolni dilgipa, sorkariko didiataha.
