Shillong, Dec 13: Bilsi re·anggimin songdongkamgipa buchuma-budeparangna pilakni gita dakchakanirangko on·na gita Elder Line, jean ge·sa National Helpline ong·a uko, Shillong, Directorate of Social Welfare-ni Conference Hall-o tom·aniko ong·ate a·dokni Social Welfare minister Pa Kyrmen Shylla, Sombar salo a·bachengate on·angaha.
Tangka nanggijagipa nombor – 14567-ko dokachi a·doko songdongenggipa pilak buchuma-budeparang da·ode sana-banani cholrang, buchuma-budeparangna dingtangmancha tarigipa bosturang, old age aro shelter home-rangni bidingo ma·sibate ra·na gita chol ong·gen. Unbaksana, helpline guidance-ni gita, pension-o nangchape neng·nikanirang, Maintenance Act aro niamni bidingo ong·gipa mamlarangni gimin dakchakanikoba on·jolgen.
Ia helpline-ko, India sorkarini Ministry of Social Justice and Empowerment, Senior Citizens Division, a·bachengate on·a baksana tangka-paisarangko on·aha.
Tom·ao jinmana aganprakangenon, ia helpline-ko songe on·na gita kamrangko a·bachengataha aro India sorkarini Ministry of Social Justice and Empowerment aro Meghalaya sorkarini Social Welfare Department aro PACE computers ia dolgittamni gisepgriko Memorandum of Understanding (MoU)o re·anggipa January 15 tariko soi ka·grikaha ine Pa Kyrmen Shylla u·iataha.
Songsalo janggi tangani bewalrang dingtanganichi nokdang dingtang cha·na nangaona sokanio songdongkamgipa bang·a buchuma-budeparangan maming dakchakani gri, sana-banani aro nirok-simsakani gri ong·na gita nangtokenga ineba ua parakataha.
Uandake, a·dokoni pilak songdongkamgipa buchuma-budeparangna dakchakanirangko on·na gita, Social Welfare Department, Health Department, Community and Rural Development Department, Food and Civil Supplies Department ba ugitarangchi Meghalaya sorkari, bang·a dingtang dingtang dakgipa scheme-rang aro programrangko ra·baenba a·bachengate on·aha.
Unbaksana, re·baenggipa bilsi -bongarangni gisepo a·dokni district damantion a·dok sorkari, buchuma-budeparangna dongchakani nokko ba old age home-rangko a·bachengate on·na gita miksongenga aro nokdangni gita maming dakchakako man·gijagipa buchuma-buduparangna pilak nanganirangko on·na gita re·baenggipa financial year-o Mawkasiang-o Old Age Home-ko rikkamna gita chu·onga gita tangka-paisarangkoba department chame on·anggen ine minister parakatkuaha.
Tom·anio, Social Welfare Department-ni Principal Secretary, Pa Sampath Kumar aro Elder Helpline Meghalaya-ni Programme Manager, Ma C C Sohliya-maangba jinmana aganprakangaha.
