Tura, Feb 9: Bristibar salo, National People’s Party (NPP)-ni national president Conrad K Sangma, Assembly-ni Deputy Speaker Timothy D Shira baksa, East Garo Hills a•jani Songsak constituency-ona re•ange, NPP-ni candidate Nihim D Shira-na campaign ka•angaha.
Songsak constituency-ni Dagal songo Conrad, jinmana aganprakangengon, batanggimin bilsi bongana a•dok sorkariko chalaianio COVID-19 sajinmani a•sel dingtang dingtang neng•nikanirangko chagrongna nangahaoba, kamrangko chu•sokatna gita NPP sorkari, rakbee kamrangko ka•aha ine parakataha.
Meghalaya a•doko batanggimin bilsi 20-30-ni gisepo chu•sokatna man•gijagipa kamrangkon batanggimin bilsi bongani gisepo NPP sorkari chu•sokatna man•aha ineba ua aganaha.
Meghalaya a•dokni bilsi 45-na re•mikkanganio, songadam nokadamrango ge 4500 nokdangrangsan chi pipe-rangko soke man•engkuachim indiba NPP-chi dilenggipa sorkari, JJM-ni ning•o batanggimin bilsi gittamni gisepon lak 3-na batpile nokdangrangna chi pipe-rangko sokate on•na man•aha ineba NPP-ni national president parakataha.
District aro constituency damantion, nangani kri niroke kamrangko ka•na gita MLA sakantinan bilko on•aha ineba a•dokni Chief Minister parakataha.
Batanggimin bilsi bongani gisepo Songsak-ni MLA Mukul Sangma, Songsak constituency-o namroro silroroaniko ra•bana gita changsaba re•ange uko grongejahani a•selan Songsak-o bang•e kamrangko ka•na man•jaha ineba Conrad, suk ong•gijaniko parakataha.
Indake ong•genchimoba, ia chang Songsak constituency-o NPP-ni candidate ong•e susaenggipa Nihim D Shira, Songsak jolrango namroro silroroaniko ra•bana gita pangnan unbaksa agangrikrongaha ineba Chief Minister parakataha.
