Tura, March 26: South Garo Hills a•jani Rongara Police Station-ni ning•o donggipa Chegnigre song samba joloniko BSF dolni sipairang, bobil dolrangni dongnue donanggipa silchidarerangko man•aha.
Koborko on•ani gitade, Bristibar salo 43 Battalion BSF-ni Rongara BOP aro Chegnigre BOP-ni sipairang, koborko man•soenba, Rongara police station-ni ning•o donggipa Chegnigre song samba jolrangoniko sandiange, bobil dake chakatgipa dolrangni dongnue donanggipa adita silchidarerangko man•aha. Ia silchidarerangko Garo National Liberation Army (GNLA) bobil dolni manderang dongnue donangahachimkon ine police-rang chanchichipenga.
Ia biaponiko BSF sipairangni man•gipa silchidarerangara, US a•songo tarigipa 0.32 mm caliber revolver ge 1, 7.62 mm guli rong 50 aro AK SVD Sniper Rifle-o jakkalgipa Iron Magazine ge 4 ong•a.
Ja•mano ia silchidarerangko BSF official-rang, Rongara police station-ni jako pakwate on•ataha.
BSF Meghalaya Frontier-ni IG Hardeep Singh-ni u•iatani gitade, Bangladesh aro India a•songni sima ari jolrango bobil dake chakatgipa dolrangni re•ruraani aro kam ka•anirangko BSF dol name nirikkienga aro ia sima ari jolrango donggipa buringrango bobil dolrangni dongnue donenggipa silchidarerangko bon•atna gita kam ka•enga.
“Chinga bobil dake chakatgipa dolrangni dongnue donenggipa silchidarerangko sandianio chu•sokgipa ong•enga aro mikkangchiba iandake bobil dolrangni dongnue donanggipa silchidarerangko sandiangkugen. A•song damgnini simarango tom•tomaniko rakkina kam ka•anio chinga chu•sokgipa ong•enga,” ine Singh aganaha.
