Baghmara, May 24: South Garo Hills a·jaoba May 24 tarikoni re·baenggipa June 1 tarikona chu·gimik lockdown-ko ra·gatangaha.
South Garo Hills a·jaoba COVID-19-ni batrikrikaniko champengna rake kamrangko ka·engoba batanggimin antirangonin COVID-19-ko man·giparang batrorobaengani gimin May 24 tarik pring 5:00 bajioni a·bachenge re·baenggipa June 1 tarik pring 5:00 bajiona chu·gimik lockdown-ko ra·gatangaha.
South Garo Hills a·jao COVID-19-ko man·giparang batrorobaengani gimin district administration-ni official-rang, dingtang dingtang dolrang baksa tom·e chanchirimangenba, sabisini batrikrikaniko champengna rakgipa niamrangko ra·gatskana tik ka·angaha.
Lockdown-ko somoio manderang skatang re·rurana, korosrangko ka·na aro kamrangko ka·na man·jawa ine district administration u·iataha.
Lockdown-ni somoio jinma tom·anirangko ong·atna man·jawa aro bia ka·ani ba mande sianirangoba district administration-oniko permission-ko ra·chengani ja·man sak 15-na bate manderang tom·na man·jawa ine u·iataha.
Lockdown-ni somoio bostu salruragipa garirang, medical, police, civil defence & home guards, fire & emergency service, MeECL, PHE, agriculture aro veterinary, municipal, PWD, NHAI, FCI, petrol, diesel, LPG aro uandakgipa nangchongmotgipa manderangni re·ruraanikode champengani dongjawa.
