Ampati, June 17: Batanggimin konta 24-ni gisepo, South West Garo Hills a•jaoba mikkarang dontonggija waanganichi dam 107 songrangko chi banangaha aro ia dam 107 songni sak 32,000-mangni gita manderang neng•nikanirangko man•tokengaha.
Koborko on•ani gitade, Rerapara C&RD Block-ni ning•o komibeoba dam 16 songrangko chi banaha aro uandaken ia songrango donggipa sak 10,273-mangni gita manderang neng•nikanirangko man•angtokaha. Chi bananichi neng•nikanirangko man•enggipa manderangna Mukdangra Bazar, New Harigaon aro Old Harigaon songni LP skulrang, Sangkarigre waiting shed aro Garobadha merong bazar-o dambonga relief camp-rangko sorkari songe on•aha.
Zikzak C&RD Block-oba dam 59 songrangko chi banaha aro ia songrango te 17 nokrang nosto ong•atako man•angan baksana ia songrango donggipa sak 27,000-mangni gita manderang neng•nikanirangko man•tokengahani gimin damsku relief camp-rangko songe on•aha ine kobor on•aha. Betasing Block-o dam 32 songrang nangchakeaniko man•skaaha aro ia songrango neng•nikanirangko man•enggipa manderangna dambonga relief camp-rangko songe on•skaaha.
Da•o dipet South West Garo Hills a•jao mande siani ba saknaa man•anirangkode kobor man•a dongskajaha.
Neng•nikanirangko man•enggipa manderangna, South West Garo Hills District Administration-ni gita Gratuity Relief-ko on•na a•bachengaha aro PHE-ni gita ringani chirangkoba suale on•na a•bachengaha.
