Shillong, Dec 23: Meghalaya a•dokni SSA skulrango skienggipa manderang, an•tangtangni man•na nangkuenggipa dormaharangko man•tokkujaengani gimin dingtang dingtang dake jingjengatna a•bachengatani ja•man ma•mong sorkari, skigiparangni dormaharangko on•na aro SSA-ni dingtang dingtang kamrangna gong kror 158-ko Meghalaya a•dokna on•ataha ine Meghalaya a•dokni Education Minister Lahkmen Rymbui parakataha.
Education Minister-ni u•iatani gitade, SSA-ni tangka paisarangko on•atchina gita a•dok sorkari, changni chang ma•mong sorkariko didiatani ja•man ia tangka paisarangko Union Education Ministry, re•anggipa December 21 tariko a•dokna watataha.
“Iani bidingo ma•mong sorkari baksa agangrike tangka paisarangko man•bae on•ahani gimin anga Chief Minister Conrad Sangma-ko aro education department-ni officer-rangko mittelpilna ska,” ine Rymbui parakataha.
Education Minister-ni u•iatani gitade, ma•mong sorkarini on•atgipa tangka paisarangchi a•dok sorkari, SSA skulrango skigiparangna December jaona kingking dormaharangko on•angan baksana elementary aro secondary education-ni skigiparangna training-ko on•anioba jakkalanggen.
Ma•mong sorkarini on•atgipa tangka paisarangko a•dokni treasury-ona watatmanaha aro da•o SSA skulrango skigiparangni dormaharangko on•na gita kamrangko ka•engaha ineba Rymbui parakataha.
SSA skulrango skigiparangni dormaharangko on•na gita a•dok sorkari, an•tangtangni gong kror 79 tangkarangko jakkalsochengaha ineba Education Minister talatangaha.
Skigiparangni dormaharangko on•na gita rakbee kamrangko ka•engoba a•dok sorkarini kosako kragija dake matnanganirangko dakahani giminba Rymbui, an•tangni suk ong•gijaniko parakataha.
