Shillong, Nov 10: Meghalaya a•dokni SSA skulrango dormaharangko on•na man•na gita India sorkari, mikkang antion gong kror 59-kode a•dokna on•atgnok ine Budbar salo, Meghalaya a•dokni Education Minister Lahkmen Rymbui parakataha.
Budbar salo, a•dokni Education Minister Lahkmen Rymbui, Delhi-ona re•ange Education official-rangko grongeani ja•man, skigiparangni dormaharangni bidingo Meghalaya sorkari, India sorkari baksa agangrikjringenga aro gong kror 140-ko on•atchina mol•molaha ine parakataha.
“India sorkari da•o dipet gong kror 59-kosan on•atgen ine chinga koborko man•soaha aro anga ka•dongenga ia tangkarangko chinga mikkang antiode man•sognok. Ia tangkarangchi komibeoba jagnini dormaharangko chinga skigiparangna on•na man•gen,” ine Rymbui aganaha.
Education Minister-ni parakatani gitade, Meghalaya a•dokni sak 12,541 SSA skigiparangna jasani dormahako on•na gita sorkari, komibeoba gong kror 26 tangkarangko nangengachim.
Meghalaya a•dokni SSA skulrango skigiparangna dormaharangko on•na man•jaengani gimin a•dokni Chief Minister Conrad K Sangma-ba suk ong•gijaniko parakataha.
“A•song gimikon SSA skigiparangna jabongani dormaharangko on•na man•kujaengani gimin a•dok gimikni chief minister-rang aro education minister-rangba Delhi-o donggipa Education department baksa agangrikjringenga,” ine Sangma aganaha.
Ian ma•mong sorkarini scheme-sa ong•ani gimin a•dok sorkari, skigiparangna dormaharangko on•na gita a•doktangni tangka paisarangkode jakkalanio neng•nikanirangko man•na nangenga ineba Chief Minister talataniko on•angaha.
