Tura, Dec 3: Meghalaya a·dokni SSA skulrango skigiparang, an·tangtangni man·gnirangko man·tokkujae neng·nikanirangko chagrongna nangtokengaha ine South West Garo Hills a·jani Garo Students Union (GSU) Zikzak unit, suk ong·gijaniko parakatenba, skigiparangni man·gniko ta·raken on·china gita a·dok sorkariko didiataha.

SSA skulrango skigiparangni man·na nangkuenggipa dormaharang da·o jadok gappilengahani a·sel neng·nikanirangko chagrongna nangtokengahani gimin Garo Hills-ni skigiparang, re·anggipa December 1 tarikonin West Garo Hills a·jani DC office mikkango okumu chake jingjengatna a·bachengatahachim ine nikna man·a.

Indake ong·engon, SSA skulrango skigiparangni iandake duk mikchirangko chakna nangtokengahani gimin GSU Zikzak unit-ni gitaba kalimpaaniko parakataha aro skigiparangni man·na nangkuenggipa dormaharangko ta·raken on·china gita a·dok sorkariko didiataha.

“Skigiparangni man·gniko sorkari tik ong·e on·jagenchimode skigiparang maikai skulrangko ka·na man·gen aro skulrangko ka·a tik ong·jahaode maikai bi·sarangni lekka porani tang·dona man·gen?” ine GSU Zikzak unit-ni general secretary Silman M Marak sing·doangenba, Meghalaya a·doko aro mongsongbate Garo Hills-o lekka porako tang·doatna gitade skanggipa skigiparangni man·gnirangko somoi gita on·chengna nanggen ine talataniko on·angaha.