Tura, May 30: Ia bilsini Secondary School Leaving Certificate (SSLC) porikkao Top 20-ni gittamgipa biapko man·e chu·sokanggipa St Xavier’s Higher Secondary School-ni chatri Salrime M Sangma-na Northeast Media Hub, dingtang dingtang dolrang aro manderang baksa chaprime gong lak 1.10 tangkako boksis dake on·angaha.

Ia chatrina NE Media Hub-ni gita gong 20,000/-ko, Mere Mentor-ni gita gong 5000/- baksana career mapping-na voucher-ko aro Tura-ni Senior Journalist Cosmos K Sangma baksana officer-rang aro gipin ripengskarangba gong 85,000/- chape gimik gong lak 1.10-ko on·ataha.

Salrime M Sangma, saksa cholgrigipa chatri ong·e chonaonin tuition ra·e poraipana chol ong·jagenchimoba, uni kamtango bimchipgipa aro kakketgipa ong·anichi ia SSLC porikkao chugipa gadangko man·e pass ka·na man·ahachim. Uko uni poraianio uni ma·gipasa chonbegipa dokkanko chalaie dakchakaha indiba ua cholgri ong·anichi an·tangni chu·sokgipa ong·aniko salrikna on·jaha aro ia porikkao Top 20-ni gittamgipa gadangko man·aha. Ian uni ma·gipana aro uni ma·drangrangnasan ong·aigija A·chik jat gimiknan mikkim rasongko ra·baaha.

Mikkangchi uni poraianirango dakchakaniko on·pana gita NE Media Hub-ba dingtang dingtang manderang aro dolrang baksa nangrime ia chonbegipa boksisko una on·ataha.