Imphal, May 3: Manipur a·doko songdongpaenggipa Meitei ba Meetai jatko Scheduled Tribe (ST)-o napchapatna am·engani kosako jegale, Manipur-ni dingtang dingtang tribal dolrang Butbar salo ku·cholsan ong·aniko mesokange jinma re·jomaniko ong·atangaha.

Meitei jatni dabienggipani kosako, All Tribal Students’ Union, Manipur (ATSUM)-ni re·jomaniko ong·atgipao chakpaaniko on·na gita a·dokni dingtang dingtang tribal dolrang lekka pal·takrango seenba jinma jegalanio bakko ra·angtokaha.

Meitei jatko ST-o napchapatna am·enganiko jegale, All Tribal Students’ Union, Manipur (ATSUM), a·dokni ning·o donggipa Senapati, Ukhrul, Kangpokpi, Tamenglong, Churachandpur, Chandel aro Tengnoupal jolrango re·jomanirangko dakna gita iana skang paratahachim.

Meetei ba Meitei jatko ST-o napchapatani bidingo agan-ku·pattianirangko ma·mong sorkarina on·atchina gita Manipur High court-ni adita salrangna skang a·dok sorkarina hukum on·anganikoba tribal dolrang jegalangokaha.