Shillong, July 15: Meghalaya State Public Services Delivery Commission-ni Integrated Web Portal-ko Sukrobar salo, Meghalaya a•dokni Chief Minister Conrad K Sangma, Shillong songjinmani Yojana Bhawan-o a•bachengate on•angaha aro ia tom•anio Meghalaya State Public Services Delivery Commission-ni Chief Commissioner MS Rao, State Informatics Officer T Dkhar aro gipin official-rangba dongpae bak ra•angaha.
Ia State Public Services Delivery Commission-ni Integrated Web Portal-ko a•bachengate on•angani somoio a•dokni Chief Minister, jinmana aganprakangengon, manderangni namgnina ka•enggipa kamrangko department ge•antion nambatatna gita sorkari kam ka•enga ine parakangaha.
Ia Integrated Web Portal-ko a•bachengatanichi, manderangna dangdike on•aniko aro pilakni gitan sorkarini kamrangko namdapatna dakchakani ong•gnok ineba Chief Minister aganaha.
Meghalaya Right to Public Service Act 2020-ara a•dokni manderangna dongimin somoi gita kamrangko chu•sokate on•na aro sorkario kam ka•giparang maikoba dakgualanirango u•iataniko on•na dongimin Act ba niam ong•achim ine nikna man•a.
