Shillong, Sept 10: Tanggitik chadrapaniko dakmiting somoio goa man·e sianggipa HNLC-ni dilgipa gitcham Cherishterfield Thangkhiew-ko so·otanio jak donggipa police officerrangko kam dondipatchina gita dabie a·dok sorkariko su·dodoangenba, Sur Ki Nong Mawlai ba Mawlai jolo songdonggiparangni ku·rang dolni gita Sukrobar salo Shillong, Main Secretariat mikkango tanggitik ong·e jingjengatenba ‘knife surrender’ ba churirangko pakwate on·aniko dakangtokaha.
Ua somoio, Mawlai jolo donggiparang aro dolni dilgiparang, Secretariat-ona napchakgipa cholgugao adita ge churirangko pakwate on·angtokaha.
Jingjengatmiting somoio, sakgittam chugipa gadangni police officerrang jekai Director General of Police, East Jaintia Hills-ni SP aro Shillong Traffic-ni DSP iamangko MDA sorkari bakbak kam dondipatna nanga ine chrik-a·bokenba jingjengatgiparang ua somoio lekka pal·takrango searangkoba mesokangaha.
