Shillong, Oct 29: Shillong songjinmani Iew Mawlong-o donggipa Sweeper’s Colony-ko Sukrobar salo Meghalaya sorkari jako ra·aha.
Iani bidingo kobor ra·timgiparangna talataniko on·angengon, Mylliem-ni Syiem-na gong kror 2-na baten tangkako gamani ja·man a·dok sorkari, ia biapko jako ra·aha ine a·dokni Deputy Chief Minister Prestone Tynsong parakataha.
Ia bilsini a·bachengachibara iani bidingo Meghalaya sorkari, Mylliem-ni Syiem aro Shillong Municipal Board-ni gisepo soi ka·grikahachim.
Ia biapo songdongenggipa manderangko gipin biapona apjitatahaon sorkari, ia biapko taridape nitoatgnok ineba Tynsong parakataha. Indake ong·genchimoba ia biapo donggipa Gurudwara aro skulni bidingo sorkarini ja·ku de·na miksonganikode ua ja·manosa u·iatgen ine Deputy CM parakataha.
Ia biapko jako ra·kujachina gita High Court-ni rai on·gipani gimin sing·on, iani bidingode ua talbate aganna gita jechakaha indiba ia biapko sorkari jako ra·ahani gimin uamang mikkangchi maiko dakna miksongenga na·simangan ma·sina nanga ine Tynsong aganchakskaaha.
Iani a·sel ia jolrango maming so·sojengjeng ong·anirang dongjawa ineba Deputy CM ku·rachakaniko on·angaha.
