Shillong, March 12: South West Khasi Hills a•jani Nongbah Jynrin-o rong•mesakrangko chimongchakenggipa tengkirangoni kenna nanggnigipa moilarang joka dongja ine Sukrobar salo, a•dokni Chief Minister Conrad K Sangma parakataha.
Chief Minister-ni parakatani gitade, Nongbah Jynrim-o rong•mesak chimongchakenggipa biap bretaha ine 2020 bilsini September 21 tariko social media-rango jangbingbanganirangko knasona man•ahani gimin bakan iani bidingo am•sandina gita South West Khasi Hills a•jani SP, police dolsako ia biapona watatahachim indiba ua biapo iandakgipa maming obostarangko nikna man•jaha.
Iani ja•mano, South West Khasi Hills a•jani District Administration-ba dingtangmancha dolsa official-rangko ua biapona am•sandina gita watatahachim indiba am•sandina re•anggipa dolni report-ko on•ani gitade, ua biapo maming gopretanirang dongjahachim ine Chief Minister parakataha.
“Rong•mesakko chimongenggipa tengkirangoni damsao a•kol damgniko nikna man•aha indiba ia a•kolara gopretani a•sel ong•ja indiba manderang an•tangtangan cho•ani a•selsa ong•aha. Ia biaponi moilarang joka dongja,” ine Chief Minister aganaha.
