Shillong, Nov 8: Mangalagiri Cricket Stadium-o ong·atenggipa Syed Mushtaq Ali Trophy-na Sombar salo kriket kal·susaanganio, Meghalaya-chini skang dokchenge kal·gipa Kishan Lyngdoh 85 run-rangko dokange aro Chirag Khurana 54 run-rangko dokangenba iamang sakgnini sichipgija ga·subee doke kal·angtokanichi dolgipin mikkangchakgipa aro kal·na sapgipa Tripura dolko plate division-o gimik wicket 10-rangchi amchepataha.
Toss-ko cheani ja·man Tripura-ni dokchenge kal·anirang inditana nama ong·jaha aro skanggipa over-on Arkaprabha Sinha, 1 mangmangko dokenba Khurana-ni jakchi ronggalchengaha. Uni ja·manba Tripura-chini wicket-rang joljolan ga·akrongrongaha indake, K B Pawan saksasan chu·gimik 33 run-rangko ra·e uamangni gisepo nambate dokgipa ong·aiaha.
Ua somoio robol goe kal·angskaanio Meghalaya-chipakni Khurana, 22 run-rangko on·e sakgni wicket-rangko ra·aha aro sakgipin robol gona rakgipa Akash Choudhary-ba gimik 24 run-rangko on·e sakgni wicket-rangko re·galataha. Unbaksana, nama tiktako robol gogipa sakgni Chengkam Sangma aro Dippu Sangma-maangba wicket sakprakko ra·e over 20 ko goe kal·anganio Tripura-na 146 run-rangkosan dokna chol on·e doltangna dakchakangtokaha.
Indake ong·engon, Meghalaya-ni doke kal·aniba a·bachengode inditana nambrejaha jeon dokchenge kal·gipa Khurana, ua somoio ariko ga·bate goanina umpire-ni no-ball on·ani giminsa rasong gnange jokaiaha, indioba uni ja·man sakgnian dolgipin Tripura-chini robol gogiparangna ge·gipin cholko on·gija name kal·angenba dolgipinko ga·subee amchepatskaaha.
Chegipa dol Meghalaya, Mongolbar salo Arunachal Pradesh-ko mikkangchake kal·angskagen.
