Shillong, Jun 2: Meghalaya a•doko National People’s Party (NPP)-chi dilenggipa Meghalaya Democratic Alliance (MDA) sorkariko, tangka paisa jakkalsretanina, niam gri koela badinganina aro dingtang dingtang ong•gija kamrangna matnange Bharatiya Janata Party (BJP)-ni mitam dilgiparang, MDA-o bakrimaniko watna manchitokengon, BJP dolba MDA sorkari baksa term matchoten dongangkugen ine BJP MLA aro Meghalaya Cabinet-o BJP-ni saksakamkam minister Sanbor Shullai parakatskaaha.
BJP-ni state president Ernest Mawrie-ni suk ong•nikgijanirangko da•o apsan tom•e chanchirimani somoio a•dokni Chief Minister Conrad K Sangma an•tangan talate on•gen ineba Shullai parakataha.
Shullai-ni aganani gitade, MDA-o bakrimaniko watanide ma•mongo BJP-ko dilenggiparangni jakosa ong•ani gimin a•doko iani gimin chanchina nangani katta dongjahachim.
Dingtang dingtang dolrang nangrime sorkariko chalaianiode iandake bakrimenggipa dolrangni ku•rang on•aniko nikna man•rongaia aro ian politics-o gital katta ong•ja ine janapatengon, term matchotkujaskal MDA sorkarina chu•gimik chakpaaniko on•angkugen ine BJP minister, ku•rachakaniko on•angaha.
Conrad Sangma-chi dilenggipa sorkario an•tangni chu•gimik ka•donganiko parakatengon, ia sorkari pilak nanga kamrangkon ka•enga aro a•doko man•enggipa dingtang dingtang neng•nikanirangko namatna jotton ka•enga ine Shullai parakataha.
Re•baenggipa 2023 bilsini Assembly election-o susaatna gita BJP dol, namnamgipa candidate-rangko sandienga ine janapatengon, batanggimin chang election-ona bate ia chango uamang bang•bata seat-rangko chena man•gen ine Shullai, an•tangni ka•dongchakenganiko parakataha.
