Tura, Feb 13: Meghalaya a·doko game ge·e cha·enggipa manderangna sorkarini gita dakchakaniko on·anio, Sonibar saloba a·dokni Chief Minister Conrad K Sangma, Tikrikilla jolrango donggipa dol 288 producers group (PG)-rangna gimik gong kror 1.86-ni cheque-rangko suale on·angaha.
Ia cheque-rangko Farmers Collectivisation for Upscaling Production & Marketing System (FOCUS) program-ni ning·o game ge·e cha·enggiparangni nangrime bikotgipa producers group-rangna suale on·angaha aro ia cheque-rangko suale on·na gita tom·aniko ong·atanio producers group-rang, self help group (SHG)-rang aro cooperative society-rangba bakko ra·angaha.
Cheque-rangko suale on·na gita tom·aniko ong·atanio a·dokni Chief Minister, jinmana aganprakangengon, game ge·e cha·enggipa manderangko dakchakna gita sorkari, dingtangmancha FOCUS program-ko ra·gate tangka paisarangko dakchake on·enga aro ia bilsini March jani gisepo a·dokni gimik dol 1650 producers group-rangna sorkari gimik gong kror 17.28 tangkarangko sualate, 2022-23 bilsini bon·aode dol 16,800 producers group-rangna gong kror 130-ko suale on·na man·gnok ine parakangaha.
Chief Minister-ni parakatani gitade, Meghalaya a·dokni itihaso ia ‘FOCUS’ programan game ge·e cha·giparangni dal·batsranggipa program ong·enga aro ia program-ni ning·o komibeoba lak 4.5 game ge·e cha·giparangna dingtang dingtang scheme-rangchi dakchakanirangko on·enga.
Ia FOCUS programni ning·o gong kror 200-ko ia bilsini gisepon chame a·dok gimikni game ge·e cha·giparangna suale on·enga ineba Chief Minister parakataha.
Ia apsan salni bakon Chief Minister-ni jakchi, sudgrigipa gong lak 29-ni loan-rang baksana gong lak 21-ni Community Investment Fund-rangko me·chikrangni dilenggipa SHG-rangna suale on·angjolaha.
