Tura, Dec 5: Sonibar pringchibara aro salpaksachibara mongma matte mangsa, West Garo Hills a·jani Tikrikilla jolo mande sakgniko so·otani ja·man jolo songdongenggipa manderangna kenjagokataniko on·angaha.
Koborko on·ani gitade, ia mongma matte skanggipao, Sonibar pringni 6:00 bajimango Menggotchigre A·ding songni me·chik saksako uni nokoni ong·katengmiting somoio chadrape so·otaha. Ia songni me·chikko so·otangani ja·man songni manderang katpripratokahaon, ia mongma matte Napakgre songona re·angskae, ia songni mande sakgniko chadrapeskaaha.
Napakgre songo ia mongma matteni chadrapanio, bilsi 52 ong·gipa Bittu Marak, maming dakchakaniko man·jae so·otako man·na nangaha.
Ia songni sakgipin bilsi 55 ong·gipa Herod Sangma-ba mongma matteni chadrapako man·e adita grengrang be·atako man·an baksana bilongbee saknaanirangko man·na nangaha ine kobor on·aha.
Saknaa man·gipa mandeko bakan Tikrikilla primary health centre-ona da·o sanna bananirangko on·enga.
Ia a·selni bidingo koborko man·soa bakan Wildlife department-ni manderang, ua biapona re·angaha aro gital koborko man·soani gitade, da·o ia mongma matte, Assam a·dokchipakna re·angskaaha.
