Shillong, May 3: Trinamool Congress (TMC) dolko Bengali party ba dol ine manderangni agananiko Meghalaya a•doko TMC-ko nirokenggipa Manas Bhunia parakataha.
TMC dolko salgro salaram a•dokrangoba bilakbatatna miksongengani gimin Meghalaya a•dok baksana salgro salaram a•dokrango kamrangko ka•dilchina gita adita salrangna skangsan, West Bengal-ni MLA aro Cabinet Minister Manas Bhunia-ko Meghalaya a•dokni TMC in-charge dake songahachim.
Mongolbar salo, TMC-ko Bengali party ine manderangni aganenggipani gimin jegalatengon, gipin political dolrangsa TMC-ko bilakatna nangnikjae, salgro salaram a•dokrango Bengali dol ine aganenga indiba ian namen ong•ja ine Bhunia parakataha.
TMC-ko Bengal-o bikotchengaha indiba ian Bengal dolde ong•ja ineba Bhunia aganaha.
Bhunia-ni aganani gitade, Congress dolkoba Mumbai-osa a•bachengahani gimin Mumbai party ine mingna kraachim indiba Congress dolkode iandake mingjani gimin TMC-koba apsan daken ra•chakna nangengachim.
Meghalaya a•dokni gimin janapangengon, Meghalaya a•doko gitcham chief minister Mukul Sangma aro Meghalaya Assembly-ni gitcham Speaker Charles Pyngrope sakgnian da•o TMC dolo donge a•dokni nanganirangna aro a•doko songdongenggipa manderangna kam ka•enga ine Bhunia parakataha.
Congress doloni ong•kate TMC-o napanggipa MLA-rang, Congress dolonan re•bapilaigen ine State Congress-ni president Vincent Pala-ni agangipa kattarangko jegalatengon, ian Congress dolni chanchipe agananisan ong•aia ine Bhunia parakataha.
