Shillong, Dec 22: Meghalaya a•doko bangki dongkuenggipa Congress dolni sakbonga MLA-rangkoba Trinamool Congress (TMC)-o napchina gita a•dokni gitcham chief minister aro Meghalaya a•doko TMC-ko dilenggipa Mukul Sangma-ni aganahani gimin, Congress doloni ong•kate TMC-o napanggipa sak 12 MLA-rangkon Congress dolona re•bapilchina gita Meghalaya Pradesh Congress Committee (MPCC)-ni working president Pynshngain N Syiem, chonnika gnang aganaha.
Congress doloni ong•kate TMC-o napangahani gimin ia sak 12 MLA-rangko Assembly-oniko ra•galchina mol•molenggipani bidingo janapatengon, ia sak 12 MLA-rangni kosako Assembly-ni Speaker mai dakgipa ja•kuko de•gen darangba ma•sikujaenga aro uamang una skangan Congress dolona re•bapilon nambatgen ine PN Syiem aganaha.
Indian Constitution-ni on•gimin niamrangni kosako darangba politics kal•na man•jawa ineba Syiem aganaha.
“Tenth Schedule-o on•gimin bilko gimaatjana gita iani bidingo Assembly-ni Speaker name am•sandichengna nangenga maina Tenth Schedule-o on•gimin bilkon gimaatahaode, ia MLA-rangni kosako ja•kuko de•enggipa mande, Supreme Court-ona re•angskanaba gnang,” ine MPCC-ni working president aganaha.
BJP dol dongenga dipetde Congress dol, NPP-chi dilenggipa Meghalaya Democratic Alliance (MDA)-na chakpaaniko on•jawa ineba Syiem parakataha.
Syiem-ni aganani gitade, Assembly-o dabigimin dingtang dingtang kamrang, jekai ILP-ko ra•gatani, Khasi aro Garo ku•sikrangko Eighth Schedule-o ra•gatani aro uandakgipa kamrangnasan Congress dol, MDA-na chakpaaniko on•engachim.
Ia kamrangni gimin agangrikna gitasa adita salrangna skang, Congress dolni MLA sakbonga, chief minister-ko grongeahachim ineba Syiem parakataha.
Skangonin Congress dol an•tangari susagipa dol ong•ani gimin re•baenggipa 2023 bilsini Assembly election-oba Congress dol gipin dolrang baksa bakrimjawa ineba MPCC-ni working president parakataha.
