Nongpoh, Feb 14: Ja·manchake koborko man·soani gita, Meghalaya-ni Ri-Bhoi district-oni Pahammawlein-o donggipa ramani kajinako ra·rikenggipa biap ba toll gate-o kam ka·gipa saksako kragija kattarangchi skatang aganani gimin uanoni adita sak manderang, mija Sukrobar salo tourist-rangko salruraenggipa saksa gari driver-ko bilongbee doka-sataha.
Iani bidingo ja·pangoniko koborko man·soani gitade, gariko chalaigipa driver, Mintu Deb, jean Shillong, Mawbah-oni ong·a, uni gari (ML 05 L 1345)ko sale Guwahati-chipakna mikkange re·angmitingo ramana kajinako gamanio nangchape uno dongsogipa saksa staff me·chik baksa adita kragija kattarangchi jegrikaona sokaha.
Indakmitingo, sakgipin uno kam ka·gipa re·bagalgalenba uko toll plaza-ni office ning·achina rimnapange jinma doktimolaha aro apsandake uni garini mikkangkoba dokpruaha ine knasoaha.
Indake ong·engon, obosta ong·gipa biapona Byrnihat Police bakan sokbaeming uamangni gisepo kajia ong·aniko tom·tomatena cholko man·aha.
Obostani gimin National Highways Authority of India (NHAI) toll plaza-o kam ka·gipa saksani agan-talatani gitade, FASTag sticker-rangko da·ode mikkango tapna nangchongmotaha aro FASTag tapgijagipa garirangkode tik ka·gimin damni duna-gniko ra·enga ine una u·iatao tangkako gamna jechakani ja·man gariko chalaigipa mande rang·san ka·o nange skatang aganna gita a·bachengaha.
Ia ong·ani ja·man, Meghalaya-ona re·bagipa saksa NHAI toll plaza-o tangka ra·anio nangchape ua driverni aro napram biapo dongsogipani gisepo kajia on·mitingko noksa de·eming uko ja·mano an·tangni social media-o mesokatenba ong·a obostako tol·e jangbingbangatani gimin uni kosako aro ua driverni kosako NHAI staff, Byrnihat Police Outpost-o mokordoma ka·angjolaha.
