Shillong, Nov 29: Meghalaya a•doko ong•enggipa obostarangko namatpilna aro tom•tomaniko ra•bapilna man•na gita pilak political dolni dilgiparangkon, politics-ni gita chanchigija a•doko songdongenggipa manderang gita chanchie, apsan nangrime kamko ka•china, Meghalaya a•dokni Chief Minister Conrad K Sangma didiataha.
West Jaintia Hills a•jani Mukroh songo ong•gipa a•selni bidingo a•dokni Home Minister Lahkmen Rymbui-ko matnange, kamtangko watchina dingtang dingtang political aro jingjengatenggipa dolrang dabitokahani gimin Chief Minister, ia kattarangko aganaha.
Ian politics-ni gita matnanggrike dongani somoi ong•ja indiba obostarangko namatpilna gita pilakan apsan nangrime kamko ka•anisa ong•enga ineba Chief Minister aganaha.
“Obostarangko namatpilna gita sorkari, dingtang dingtang ja•kurangko de•aha aro a•dokni dilgiparangba iandakgipa obostao politics-ni gita chanchigija a•doko songdongenggiparang gitan obostarangko namatpilna nangrime kamko ka•na nangenga,” ine Sangma aganaha.
Mukroh songo Assam police-rangni goanichi songni sakbonga manderang so•otako man•na nangahani gimin, re•anggipa November-ni 23 tarikosan UDP-ni working president Paul Lyngdoh, a•dokni Home Minister Lahkmen Rymbui-ko matnangatenba, kamtangko watchina dabiangahachim ine nikna man•a.
Apsan daken, Sombar salo BJP-ni national general secretary Rituraj Sinha-ba ia a•selni bidingo Home Minister Lahkmen Rymbui-ko matnange, daiko ra•enba kamtangko watchina dabiangahachim.
