Williamnagar, Oct 28: Nongalbibra Tourism Society, District Tourism Department aro Self Help Group (SHG)ni Rikdime VO aro Bakrike VO baksa nangrime ia October 28-oni 30 tarikona kingking salgittamna ong·atenggipa Tourist Guide & Training Operator Training-ko South Garo Hills-ni ning·ogipa Nongalbibra songni Awemong Simsang Zero Point Camping Side-o a·jani Deputy Commissioner Pa F M Dopth-chi Bristibar salo oprake on·angaha.

Ia training-ona, Garo Hills-ni dambonga district-rangoni bakko ra·na gita soktokaha aro una agreba, Tura, ICFAI University-oni sak 13 chatrorang aro Tura, National Skill Training institution-oni sak 7 aro Nongalbibra songni manderangba bak ra·tokenga. Training-o bakko ra·enggipa gimik sak 100 mang gapaha ine Nongalbibra Tourism Society-ni President Te. Digros Shira u·iataha.

Indake, Bristibar salo training-ko a·bachengatani skanggipa salo, A·chik Tourism Society-ni General Secretary Pa Dipu Marak aro District-ni Tourism Officer Pa. Chequebera B Sangma-maang skie on·angaha ine koborna u·iataha.