Tura, Mar 26: A·chik Literature Societyni Department of Garo, NEHU Tura Campus baksa nangrime Regional Workshop on Traditional Musical Instrument and Performing Arts-ko 21st oni 25th March, 2022 ona ong·atgipa da·al sukrubal sal 25th March-o Valedictory function ong·e matchotaha. Ianona mongsonggipa sokgipa Pa Albinush R. Marak, Hon’ble CEM, GHADC, Tura-ni agananio, chadamberang skia-poraniko skie ra·an baksa, jatni doka-damani, sika-moanirang, minga-ring·anirangna gisik nangchina aro jatni dakbewal rikbewalrangko ripinge jatko niksengatchina didiaha. A·chik jatni dakbewal manianirang jolni dingtanga aro uarang gimaangengani gimin uarangko see rakina didiangaha.
Workshop skie ra·giparang songtang-noktangona re·angpilon, saksa sakgipinna an·tangtangni skia man·giminko skirikrike jatni doka-damarangko A·chik a·song gimikon gipatchina didiaha.
Workshopo skigiparangoni Dewal M, Sangma, A·chikrangni ku·riting aganao, dama dokna, chigring tarina, dakok sikna, chrokna a·bachenggiparangko agane, ajema roa, dore ratani gimin talate on·aha. Sakgipin skigipa Ringjeng T. Sangma, sarendako doke ajea, ahoia, grika, dama doka, nanggorere goserong, Sonatchi Khalsinni gitni sulko sale mesokaha.
Workshop ong·mitingo matchote sol·gimin dama, sarenda aro dotdrongko jinmana mesokangaha. Workshopo skie ra·gipa chatro-chatrirang damako chigring baksa knatoe doke “Dim dim dimchong” gitko ka·sroke ringe an·saoataha. Workshopo donggiparangna certificaterangko mongsonggipa sokgipa Pa Albinush R. Marak, Hon’ble CEM aro Pa Sengchim N. Sangma, Hon’ble Chairman, GHADC aro Pa A. B. Marak Executive Member, HAAT GHADC, Tura-ni jakchi on·angaha. Bon·kame, Wangala chrokako workshopo skie ra·giminko chatro-chatrirang nitobee chroke mesokangaha.
