Shillong, June 1: Re•anggipa Mongolbar salo, Shillong songjinmani Nongthymmai jolo, traffic police saksako saldape katna jotton ka•anina aro uko kragija dake jak sokahani gimin Budbar salo Shillong songjinmani police-rang mande sakgniko rim•aha.

Mongolbar pring 11:30 bajimango, ML-05T 8200 Super Carry pick up truck gari bolsa, Nongthymmai junction-o niam pe•e, gipin garirangko apchangket ong•atahani gimin Traffic police saksa Dustar Lyngkhoi, ia gariko rim•na am•on, ia garini driver uko saldape ua biaponi katna jotton ka•ahachim aro ja•mano ia truck garini handyman-ba ia police-ko kragija dake jak sokahachim.

Ia a•selni bidingo social media-rango watpripraatani ja•man police-rang, Upper Nongrah-ni Johnyrias Marboh aro Nongrah Umjapung-ni Augustin Marbong minggipa manderangko rim•aha ine police-rang u•iataha.

Ia manderangko kacharina pakwate on•atengaha ineba police-rang u•iataha.