Shillong, June 1: Mal-bostu gri salangenggipa trak gari bolsa ML 09 A 2142, mija Butbar salo Rongkhugre minggipa songo bi·sa sakgniko salpakanichi saksa a·damon sikamaha aro sakgipin bilongbee saknaa man·aha ine koborna u·iataha.
Ia a·selara West Khasi Hills a·jani Shallang ba Challang-ni ning·ogipa Rongkhugre songo Butbar attam 6 bajimango ong·ahachim aro ia obostao Rongkhugre songoni saksa Ginda M Marak-ni depante bilsi 12 ong·gipa Bindu M Sangma a·damon janggi galaha, indake apsan songoni saksa Naran N Sangma-ni demechik bilsi 16 ong·gipa Simchira G Marak ia a·selo jokkom ong·aha aro bang·e ru·utgijan uko sanna gita Goalpara-china watataha ine ja·pangoniko koborko man·soaha.
Indake ong·engon, trakko salgipa West Khasi Hills-ni Wathre songoni saksa Sujan Marak-ni depante bilsi 35 ong·gipa Jarman Ch Sangma-ko unomiting mande jinma rim·enba doktimolaha jeni a·sel uaba aditan saknae jokkom ong·na gita nangaha aro apsandaken ukoba nokni manderang sanna gita Goalpara-china ra·angaha.
A·selo sianggipa bi·sani manggisiko niam gita porikka ka·e nianiko dakatahaoba, nokni manderang manggisiko rate porikka ka·ataniko nangnikjani gimin Mawshynrut-ni SDO-oniko ge·etaniko man·ani ja·man manggisiko nokni manderangna pakwatatgen. Indake ong·engon, ia obostani bidingo niamo pangchake pilak dakna nangani kamrangkoba ka·ataha aro trak gariko police station-ona salbae doneaha ineba koborna parakataha.
Iakoba poraie nina man·gen: SGH-ni officer-rangko nambate kam ka·china Baghmara MLA didia
