Agartala, March 3 : Tipra Motha Party (TMP)-ni dal•batgipa nirokgipa Pradyot Bikram Manikya Deb Barman, uamangni dolni sakgni dilgiparang baksa sonibar salo tripartite ba dolgittam ku•monggrikaniko ma•mong sorkari aro Tripura Government baksa soi ka•grikaniko a•songni skotong songjinma-o dakangaha. Ia soi ka•grikanichi a•doko songdong a•chaenggipa tribal manderangni nengnikanirangko chel•atanggen ine ua aganangaha.
Deb Barman jean Delhi-oni robibar salo Tripura-ona re•bapilgen, social mediao video ka•enba indake u•iataha, “chinga historical accord ba ma•ambioni dakbaenggipa ku•monggrikaniko soi ka•grikaha, aro indake chinga dilgiprang ong•e aro ia a•dok-o songdong a•chakamgiparang ong•e mikkangchi krengbate kamko ka•angkugen.”
“An•ching antangtangni songdong a•chaenggipa a•dok chigana chamgimin tangka paisako jakkalani, ku•aganani ba oikorni bidingo chagronggenggipa neng•nikanirangko, sason ka•ani biding-o aro ma•ambini,jatni mikkim rasongko tange rakkina rak•e kam ka•aniko dakna nanggen. Ia chingni nangnike dabianiara niam ni gita kragipa ong•a. Chinga sorkariko tribal manderangni niamrangko rakkiangni bil aro a•doktango a•ani bidingo neng•nikarangko bon•ataniko nangnika” ine TMP-ni dilgipa kobor ra•timgiparangna aganaha.
Tripura a•doko songdongenggipa million bri sak manderangoni bak gittamoni baksade tribal manderangan ong•a.
Soiko ka•grikani ja•mano, Union Home Minister Amit Shah uni aganprakanio Tripura ni ma•ambini gimin janape aganangahani gimin Deb Barman kusi ong•e mitelpilska•ani kattarangko aganangaha.
Tripartite agreement o soi ka•grika-ni gitade, agreement o soi ka•grika-ni miksonganirangko chu•sokatna bakrimgimin dol ge•sako bikotanggen jean dongimin somoirangko niroke kam ka•aniko dakanggen.
Deb Barman-na agreba, opposition partyni dilgipa aro TMP-ni dilgipa Animesh Debbarman, TMP-ni President Bijoy Kumar Hrangkhawl, Tripura ni Chief Secretary J K Sinha, aro Home Minister-ni Additional Secretary (NE) Piyush Goyal ma•angba tripartite agreemento soi ka•grikaniko dakangaha.
Soiko ka•grikmiting somoio Tripurani Skotong Minister Manik Saha, gitcham Skotong Minister Biplab Kumar Deb, Tribal Welfare-ni Minister Bikash Debbarma, Tribal Welfare (TRP aro PTG)-ni Minister aro Indigenous People’s Front of Tripura (IPFT)-ni dilgipa Sukla Charan Noatia, BJP dolni spokesperson ba agantimgipa Sambit Patra, aro TTAADC-ni Chairman Jagadhish Debbarma-ba ma•angba dongpaachim.
TMP dol jean ‘Greater Tipraland’ ba tribal manderangna dingtang a•dokna India a•songni Niam Ki•tapni Article gni aro gittam-o pangchake February jani 28 tarikoni Tripura ni Hatoi Katar jekon Baramura ineba mingachim, ua songni National Highway-8 o dabianiko dakbaenga. National Highland-8 Tripura a•dokni mongsonggipa biap ge•sa ong•a.
TMP dol Tripura Tribal Areas Autonomous District Council ( TTAADC )ko bilakbatatna, tribal manderangni niamrangko naljoke rakkichina, tribal autonomous body ba tribal manderangni bikotgimin dol na tangkarangko uamangni jako on•china aro tribal manderangna a•ani biding-o tarigimin niamrangko namdapatchina dabianiko dakenga.
Tripura a•dokni apala 10,491 sq km mangni gita ong•a, aro ia a•dokko bak dakatgenchimode bak gittamoni baksa TTAADC-ni ningao ong•a, iano sak 12,16,000 manderang songdong a•chaenga, jeoni 84 percent ni gita manderang tribal ong•a, uni gimin Tripura Assembly-ni jamande ian gnigipa mangsonggipa dol ge•sa ong•enga.
Na·simang iakoba poraie nina man·gen: Boko-o na·tok rim·ani festival-ko ong·ata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
