Agartala, Aug 26: Tripura a•dokni chi banenggipa biaprango da•o ka•sinsin chirang tipangna a•bachengengaha indiba obostarang namsrangkujaengani gimin dingtang dingtang a•jarango songe on•gipa dam 525 relief camp-rango, lak 1-na baten manderang ma•chake dongna nangtokkuenga.
Re•anggipa August 19 tarikonin Tripura a•dokni South Tripura, Gomati, West Tripura, Sepahijala, Unakoti aro Khowai a•jarango chi banahani a•sel sak 31 manderang sina nangaha aro mande sakgni gimakuengachim ine nikna man•a.
Chi bananio bang•a nokdangrangan an•tangtangni nok-jamrang, bagan barirang aro ma•manti gamchatgipa bosturangkoba gimaatna nangaha.
Butchuma saksani Hub News-na aganani gitade, da•o chirang ka•sinsin tipangengahani gimin uamang an•tangtangni nokrangko rongtalatna a•bachengaha indiba chi bananio an•tangtangni gam-jinrangko gimaatna nange uamang da•o neng•nikanirangko chagrongna nangkuenga. Chi bananio neng•nikanirangko chagrongna nangenggipa nokdangrangna samrangko sualchina aro nokrangko rikna gita dakchakanirangko on•chinaba ua sorkariko mol•molataha.
Indake ong•engon, Tripura a•dokni bang•a biaprangon chi bananganichi neng•nikanirangko chagrongna nangtokengani gimin Robibar salo, Tripura a•dokni Chief Minister Manik Saha, dingtang dingtang dolrang baksa Agartala-o tom•aniko ong•atangaha aro neng•nikanirangko chagrongna nangenggipa manderangna dakchakanirangko on•ani bidingo chanchirimangaha.
Dingtang dingtang dolrang baksa tom•ani ja•man kobor ra•timgiparangna talate on•angengon, Tripura a•doko chi bananichi komibeoba gong crore 15,000-mangni gita noksan ong•atako man•na nangaha ine Saha parakataha.
Duko ga•akenggipa manderangna dakchakanirangko on•na kamrangko a•bachengengaha ine janapatengon, sanna bananirangko nangenggipa manderangna dam 700 medical camp-rangko kuliaha aro chi bananichi jachange dongna nangenggipa biaprangna packet 23,000 cha•ani bosturangko helicopter-rangchi salange on•aha ine Tripura CM parakataha.
Chi bananio sianggipa mande sakprakni nokdangna gong lak 4-ko aro saknaa man•gipa mande sakprakna gong lak 2.5-ko sorkari on•na tik ka•aha ineba Saha parakataha.
Na·simang ia video-koba nina man·gen:
Na·simang iakoba poraina man·gen: CM gitcham Salseng C. Marakni a·doktangna on·chotangani
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
For news & updates, Download Hub News App from Google playstore
