Agartala, Nov 22: Katbrangbagipa Bru-Reang jatrangko a·doko songdong-a·chana chol on·aniko namnikjae jegalenggiparangni mija Sonibar pringo Tripura a·dokni Kanchanpur sub-division-o jing·jengatmiting somaio Tripura State Rifles (TSR)ni sipairangni slairang goanichi knasoani gitade saksa siaha aro gipin sakbonga jokkom ong·tokaha ine koborrangko man·soaha.
Obosta ong·gitikao sianggipa mandeara, katbrangbagipa manderangko sub-division-o songdongna gita cholrangko on·ani kosako chakate jegalanirangko dakdilenggipa Joint Movement Committee (JMC)ni membor ong·achim ine ma·sina gita man·aha.
Jolo songdongenggipa Mizo aro Bengali jatgnini nangrimgimin JMC dol, a·jani wilwilao songdonggipa manderang jelani kosakon da·o sak 30,000 Bru jatrangko songdong-a·chana gita cholrangko on·taiode batesa namjabatgnok ine chanchisoenba Kanchanpur jolo uamang dontonggija jegale jingjengatanirangko dakna manchiangaha.
Sub-division-o section 144 niamko ra·gatatahaoba, jegalgiparang adita salrangonin ua ge·etgimin niamrangko manigija bang·a manderang tom·dake ramarango batesa jingjengatanirangko dakangtokaha.
Indake ong·engon, obosta ong·gitikao jokkom ong·gipa sakbri manderangko Dharmanagar, district hospital-ona ra·angaha, indake saksa bilongkalgipakode Assam, Silchar-ni Silchar Medical College and Hospital-china ra·angaha ine koborko man·soaha.
Ia brangbagipa Bru-Reang jatrangara batanggimin 1997 bilsi jolo jatsa-jatgipin baksa kajia-golmal ong·angmiting somaio onchepanirangko man·ani ja·man uamang Mizoram a·dokoni katbaeming salgro Tripura district-ni dam-dok refugee camp-rango dongbagiparang ong·achim.
Brangbagipa manderangko Tripura a·doko songdong-a·chachina cholrangko on·ani gimin, ma·mongni dilgipa Union Home minister Pa Amit Shah-ni dongpaanio ia bilsi January jao skotong New Delhi-o dal·e tom·aniko ong·atangani ja·manosa tik ka·aniko dakangaha. Katbrangbagipa Bru jatko a·doko songdong-a·chana cholko on·china gita ma·mong sorkariba tangka gong kror 600-rangko a·dok sorkarina on·ataha.
Iarangni gisepon, a·jani sub-division-ni adita dam biaprango jegale jingjengatgiparang gari tire-rangko so·enba ramarangko champengangtokaha. Uasan ong·aija, adita bol garirangkoba uamang wa·al so·e nosto ka·tokaha.
Iani bidingo, JMC-ni dilgipa Sushant Bikash Barua-ni aganani gitade, maming ding·chaoatani grian TSR-ni sipairang Panisagar Holy Cross School mikkango jingjengatgiparangko slaichi goaha.
Ia ong·anga obostao, maini a·selo slairangchi gona nangao ga·akachim iani gimin namedake talkujaienga, ine ja·pangoniko koborrangko man·sodapaha.
