Agartala, Mar 13: An·tangtangna on·gimin bilko man·na gita Tripura a·doko songdongenggipa pilak Tribal manderangkon ku·mong nangrimchina gita Sonibar salo, Tripura Tribal Areas Autonomous District Council (ADC)-ni ning·o donggipa Tipraha Indigenous Progressive Regional Alliance (TIPRA)-ni chairman Pradyot Kishore Debbarma didiangaha.
Sonibar salo TIPRA-ni tom·bimonganiko skanggipa changna Vivekananda Stadium-o ong·atangaha aro ia tom·bimonganio Tripura a·dokni non-Tribal-rangko man·chape TIPRA-na chakpaenggipa hajalni hajal manderang bakko ra·angtokahachim.
Ia tom·bimonganio, adita salrangna skang Union Home Minister Amit Shah, CPI-M-ni general secretary Sitaram Yechuri aro Politburo-ni member Prakash Karat-na tom·anio manderangni bak ra·ana baten bakko ra·angtokaha.
Ia tom·bimonganio hajalni hajal manderangna TIPRA-ni chairman aganprakangengon, TIPRA-ni dakgrikdilenggipa ‘Greater Tipraland’-ni bidingo manderangna ma·sisretaniko on·na jotton ka·enga ine BJP aro CPI-M dolrangko matnangataha.
Ia ‘Greater Tipraland’-ko uamang, a·doko songdongenggipa Tribal-rangnasa dingtang ma·eke on·china dabienga aro ia dabianio Tripura a·dokni pilak Tribal-rangan, TIPRA-na chakpaaniko on·enga ineba Pradyot Kishore Debbarma aganaha.
“ADC-ko 1980 bilsirango, Indian Constitution-ni Sixth Schedule ning·o songahachim indiba da·alonan darang sorkarirangan, ADC-rangko niamo pangchake an·tangtangni bilo chalaina on·jaenga. ADC-na a·dok sorkari chu·onga gita tangka paisarangko chame on·rongja aro election changantian dingtang dingtang national party-ni dilgiparang, ADC-na jakgitelaniko on·gen ine ku·rachakgenchimoba cheani ja·mande maming dakchakanirangko aro jakgitelanikoba on·rongja. Uni giminsa chinga niamo on·gimin bilna dakgrikenga,” ine Pradyot aganaha.
Da·o mikkang chang Assembly election-o TIPRA dol, a·dokni pilak dam 60 constituency-rangon susagen ine janapatengon, an·tangtangni politics-ni gita man·gninamangmang chanchie Tribal-rangni ku·mong nangrimaniko pe·jachina gita dingtang dingtang Tribal dolni dilgiparangko aro kam ka·giparangko ua mikrakataha.
ADC-ko Constitution-ni Article 244 (A)-ni ning·o autonomous state council ong·atgen ine batanggimin chang Assembly election-na skangde BJP ku·rachakaniko on·angahachim aro ia election-o ku·rachakaniko man·enba, Tripura a·dokni dam 20 tribal reserved seat-rangoni dam 19 seat-rango songdongenggipa Tribal-rang BJP-ko cheatahaoba, sorkariko rikani ja·mande BJP dol, ku·rachakatangko chu·sokatjahachim.
