Tripura, August 19: Border Security Force sipairangni kosako National Liberation Front of Tripura bobil dol, sukrobar salo chandal goe chadrapanio sipai saksa so’otako man’aha.
Agartala-o Police doloni agantimgipani uiatani gitade India- Bangladesh sima-arini North Tripura jolni Simana Two-o nirokna wenani somoio NLFT bobil dol chadrapaha jeon bilsi 53 onggipa Havildar Grijesh Kumar goa mane sanna bananiko dakna Agartala hospital-ona rimango janggi galaha.
Bobil dolni manderang Bangladesh arichipakoni BSF sipairangni kosako chadrapchengaha aro warachakanio BSF-rangni chandal gochakanina joljol diltubegipa burungchi nape katangaha ine koborrangko parakataha.
Asel ongani bakan Tripurani IGP Arindam Nath-ni dilanio Tripura State Rifles aro BSF-ni daldalgipa Official-rang asel onggipa adamona rikangaha.
Asel onganio janggitangko gimaatgipa BSF Havildar, Madhya Pradesh adokoni onga aro ua BSF 145 battalion-ni bak ongachim.
Sukrobar salo asel onganian ia bilsini skanggipa bobilrangni chadrapchenggipa onga aro ian Mizoram adokni sepango ongaha.
Asongsa asonggipin baksa sima ari sualanio Tripura, 856km. mangni gita Bangladesh baksa nangchapgipa onga jekon ari kapenge donachim.
