Tura, Mar 27: Tura Civil Hospital-o donggipa Medicine Department-ni dialysis unit-ko Meghalaya a·dokni Chief Minister Conrad K Sangma, Sonibar salo oprake on·angaha aro ia dialysis unit-ko oprake on·angani somoio West Garo Hills a·jani Deputy Commissioner Ram Singh baksana gipin officer-rangba bakko ra·angaha.
Ia dialysis unit-ko oprake on·anganio a·dokni Chief Minister, jinmana aganprakengon, bang·a manderangan dialysis-ko dakna gita Guwahati aro uandakgipa gipin songjinmarangonasa re·angna nange bang·en koros ong·na gita nangtokengachim indiba da·o Tura Civil Hospital-on dialysis unit-ko kuliahani gimin ka·rongteni sabisi donggipa aro dingtang dingtang saani donggipa manderang Tura-on dialysis-ko dakna man·gnok ine parakangaha.
Manderangna nambata sanna banani cholrangko on·na aro songadam nokadamrangoba health centre-rangko namdapatna gita sorkari kang·kare kae kamko ka·enga ine janapatengon, a·doko sanna banani kamrangko nambatatna gita a·dok sorkari, ia bilsini gisepo tangka paisarangko bang·bate chame on·aha ine Chief Minister parakataha.
Antignini gisepon Dalu CHC-na ultra sound machine-ko on·gnok aro bakan internet gita sagiparangko see rakkiani cholkoba a·bachengatgnok ineba Sangma aganaha.
Ia tom·anio West Garo Hills a·jani Deputy Commissioner Ram Singh-ba jinmana aganprakangengon, Tura Civil Hospital-o trauma centre-ko a·bachengatna aro songadam nokadamrangoba dingtang dingtang sanna banani cholrangko on·dapna nangengani gimin aganangaha.
