Tura, August 25: National Renewable Energy Day ba Akshay Urja Diwas, jekon bilsiantian August 20 tariko Prime Minister gitcham Rajiv Gandhi-ni atchiani salko gisik ra·ani bak gita manirongachim indiba chuti dongani a·selo Tura Don Bosco College, August 24 tariko ra·doe maniangskaaha.
Ia manianiko Don Bosco College-ni Physics Department B. Sc Chatro Chatrirangna manianiko ong·atangaha.
Tura Govt College-ni niksenggipa Reuter Balzack M Sangma, mongsonggipa skigipa ong·e sokbaaha. Reuter, bikotaitaina man·gipa bil-ni bidingo aganan baksa koelaoni, balwaoni aro sogimin bosturangoniko bikotna amgipa bilrangni gimin tosusagrikaniko mesoke skie on·angaha.
College-ni Principal Fr Bivan Rodriques Mukhim, nengrae man·enggipaoniko bijolini bilko bikotna nangenganiko aganan baksa, college-o sal-oniko bikote jakkalenggipa bil-ko jakkalenganiko janapjolaha.
Program-o rimchaksoani kattako Physics-ni HOD Mahidhar Rajbongshi aganaha. Indake ia program-o, Physics honours-ko dakenggiparang rimchaksoani gitko ring·skaaha.
Bon·kame, Physics Honours-ko 3-gipa semester-o poraienggipa Tra Dimre Sangma, mitelpilskaani kattarangko agane programe-ko matchotataha.
