Tura, Sept 19: Tura-ni District Football Association aro Meghalaya sorkarini ning·o donggipa District Sports Office-ni nangrime ong·atgipa Tura Futsal League 2021, Sonibar salo Tura-ni Don Bosco School kal·chakramo nambee matchotangaha aro ia Tura Futsal League-ko ong·atanio Hub News-ba dakchakpaaniko on·angaha.
Bon·kamgipa kal·susaanio Bugara United aro Rongkhon Sports Association-ni gisepo kal·susaangenba, ia kal·susaanio Bugara United, goal 5-ko chipe goal 2-ko chipna man·gipa Rongkhon Sports Association-ko chee, ia Tura Futsal League-ni champion ong·aha.
Ia bon·kamgipa kal·susaanio kal·gipa dolgnian da·o re·baenggipa September jani bon·kamgipa antio, Shillong songjinmao ong·atna sienggipa State Futsal Championship-o West Garo Hills a·jani pal re·ange bakko ra·angskagnok.
Ia Tura Futsal League-ni bon·kamgipa kal·susaanio a·dokni gitcham minister Billykid A Sangma aro Boldamgre-ni MDC Stevie Marak, dongpaenba chegiparangna boksisrangko suale on·angaha. Boldamgre-ni MDC Stevie Marak-de chegipa dolni manager-ba ong·achim.
Ia Tura Futsal League-o Tura DFA-o bak ong·enggipa dol 10 club-rang bakko ra·angaha aro ia kal·susaani gimiko Bugara United-ni Silco A Sangma-na ‘best player’-ni boksisko on·angaha.
Rongkhon Sports Association-ni Kadesil Sangma-na ‘best goalkeepeer’ aro ia kal·susaani gimiko goal 12-ko chipgipa Rongkhon Sports Association-ni Justwane Sangma-na ‘top scorer’-ni boksisrangko on·angskaaha.
Chinga North East Media Hub-ni gita ia jolrango kal·susaani, doka dam·ani aro dingtang dingtang changa sapanirangko ra·dona kam ka·engon, Tura-o District Football Association baksa bakrime, ia skanggipa Tura Futsal League-ko ong·atna man·ahani gimin namen kusi ong·a.
