Tura, Oct 15: Hoolock Gibbon, jekon an·ching A·chikrang Huro ine minga, mija Sonibar pringo West Garo Hills, Tura-ni Upper Chandmari jolo donggipa Gandrak gittimo karen sringgipao nange siaha, aro ia obosta ong·anina ua jolo songdonggipa manderang batanggimin somoio MeECL aro Forest Depatment-ni manderangko nirok-sandie kamrangko ka·china changni-chang u·iatgenchimoba maming ki·sang-sko sajani gimin matnange aganangtokaha.
Ia obostara, pring 6 ata bajimangni somoio huro manggittam, 33kv aro 11kv bijoliko sringanggipa siliting donggipa gita batsotmitingo ong·ahachim. Silitingrango karen re·aniko maming champengani dongja baksana ua silitingrangko mande nokrang aro ua jolni buring samba chapchapesa sringahachim.
Iani bidingo Hub News baksa agangrikangengon, rake gam·ako knaani gimin uamang tusioni mikraktokpilaha, uandake am·e niwilwalon wal·ku chadopile kama man·eming huro mangsani siakosa uamang niktokaha ine gittimoni saksa aganataha.
Ia obostara da·osan ong·aija, maina ia gittimo huroni karen nange sian da·omingde changgittam gapengaha. Ia mamlako bang·a changon Addinggre Development Committee, MeECL, Tura Municipal Board aro Forest department baksa nirok-sandie kamrangko ka·china u·iatmanahachim, indiba maming namgni dongja ineba ua agandapataha.
Addinggre Development Committee-o membor ong·pagipa Dulal Sangma-ba, apsan obosta ong·taipilanina an·tangni suk ong·gijaniko parakangengon, transmission line-rangko sringani somoion uamang, MeECL aro Wildlife departement-na mikkangchi maiba a·sel-obostarang ong·gnini gimin mikrakatsoahachim aro changni-chang iako kosakchina u·iatahaoba, department ge·gnian maming ja·kurangko de·ata dongchipkuja ine matnangatan baksa, karen nange a·sel ong·chengani ja·man MeECL aro Wildlife department nangrime a·damona re·bae nirokaniko dakatpilani ja·manba, da·ona kingkingan uamangchini maming kobor dongtaikuja ineba Sangma u·iatjolaha.
Buringo donggipa makkrerang aro hurorang da·ogita, ua gittim jolona ong·onbarongani giminan committee, apsan obostarang ong·piltaina kenchaksoani gisepon mija Sonibar pringo huro mangsa karen nange sitaiahani gimin, mikkangchina champenganirangko dakchina gita wildlife department aro MeECL-ko ua apsandake mol·molangtaipilaha.
Committee-oniko NOC-ko ra·chenggijasa MeECL ua bilakgipa karenko gittimo sringaha ineba committee, department-ni kosako matnangataha.
