Tura, April 20: Salgnina Tura Parade Ground-o ong•atenggipa Tura Industrial Fair 2.0-ko Bristibar salo, West Garo Hills a•jani Deputy Commissioner Jagdish Chelani a•bachengate on•angaha aro ia industrial fair ba exhibition-o Tura-ni samba jolrango donggipa dingtang dingtang biaprangoni gimik sak 47 bading chiwalgiparang, an•tangtangni tarigimin bosturangko mesokna aro palna gita bakko ra•angtokenga.
Ia industrial fair-ko joltango bading chiwale cha•enggipa manderangko aro uamangni bosturangko tang•doatna gita ong•atenga aro ia exhibition-o mitam sorkari department-rangba bakko ra•enga.
Ia Tura Industrial Fair-ko ong•atani bidingo West Garo Hills District Commerce & Industries Centre (DCIC)-ni functional manager Frederick A Sangma, Hub News-na agan-talate on•angengon, ian dal•drobaenggipa chadambe bading chiwalgiparangko ra•dona ong•atenggipa exhibition ba industrial fair ong•a aro ia exhibition-o nambatgiparangko seokenba sorkarini dakchakanichi, IITF aro a•songni gipin exhibition-rangona watatskagen ine parakataha.
