Tura, December 10: Ia bilsio Me·gong Festivalni bak ong·e, December 9 tariko Tura Me·gong International Literary Festivalko Tura Don Bosco College aro A·chik Literature Soceity nangrime ong·ataha. LITERATURE FOR CULTURAL PRESERVATION ine pangchakaniko ra·e, ia tom·aniko ong·atani miksongara jatni dakbewal ka·bewalko sea-jotachiba ripingna ine ong·a ine Organising Secretary, Barbara S Sangma aganaha.

“Na·a an·tangna ku·tangna, jatni dakbewalna ka·sajaode sakgipinko ka·sachina ka·dongnabe. Jatna ka·saani aro jatna kam ka·anide nang·onian a·bachenggen,” a·dokni Education Minister, Rakkam A Sangma, ia progamko ong·atania jatna gantiko kadea gita ong·a ine aganjolaha. Jatni dakbewal ka·bewalko bi·samitingonin skie on·na gita class chonaonin curriculumo napatna sorkari ja·ku de·enga; uko maidake dakna nanggen jatni ku·pattianiko sorkari nanggen ineba Rakkam A Sangma aganaha. Poraigipa chadamberangko didian baksa mol·molaniko on·angaha, “Jemangan da·alo Master Degree poraitokenga, jemangan PhD daktokenga aro dakna miksongenga, degreena mangmang dakpaainabe, uan jatna aro a·songna gam ong·china ineba chanchiningpabo ine anga mol·mola.”

“Scholar aro writer-rangni nama kamrangna a·dok sorkarini gita tangka paisa on·e dakchakna tarie donga; research ka·bo, sebo, ki·tap chapa ka·bo,” CM Conrad K Sangma aganaha. Garo ba Khasi ba Jaintia je jatniba ong·ja maina, chua gadango research dakgiparang Meghalaya a·doko chu·ongkujaenga; jatni bidingo see-jote rakkiasan ong·ja, jawilwatrangni bewaloba rakkina nangbeenganiko ua agandapaha. Ki·taprangko see aro chapa ka·china ua bilakgipa didianiko on·angaha.

“Je jatoba ong·ja maina, dingtangmancha ma·eke mesokna man·gipa dakbewal ka·bewal dongjahaode aro uarangna simsakjaode jat gimaa” ine agane, jattangni gimin mikrake dongchina aro gisik nangchina gitan indakgipa programrangko ong·atenga ine Conrad aganaha. Bangladeshoni sokbae bak ra·gipa Garo Manderangkoba mittele, “Na·a an·tangni ja·pang ja·dilkon aro ma·ambikon gualode na·a an·tangara sawa ukon gualenga” ina kattarangkoba ua naataha.

Re·baenggipa Meghalaya Games-o jatni kal·susaanirangkoba ong·atgen ine aganengon, Garo Hillso Tribal Research Instituteko a·bachengatgipani bidingoba ua janapjolaha. Ua instituteko chu·gimik ong·atna cho·on cho·onsa chu·sokatangna man·gen, aro ja·manode uan Northeast Indiani Tribal Database ong·gen ine uni kattarangoniko u·irikna man·a.

Me·gong International Literary Festival — iako skanggipa changna Me·gong Festivalni bak ong·e ong·ataha, jekon CM-ni Special Fundoniko tangka paisa on·e dakchakaha. Indiba uko ong·atna chanchigipa aro kam ka·e chu·sokatgipade Tura Don Bosco College aro A·chik Literature Society ong·a ine CM an·tangan aganaha. Organising Secretary Barbara S Sangmani aganani gitade ia programko bang·gija antirangna skangsan chanchie kam ka·e ong·ataha. Indiba uni kride program nambee chu·sokaha aro bang·en skidapaniko man·tokaha ine uano dongpagiparang kusi ong·e golpotokaha.

Literary festivalko ong·atanio Dr. Rhinkle M Marakni Kambe Ganda novelko aro Aristotleni The Art of Poetry-ko Prof Caroline R Marakni pe·skae segipa ki·tapko CM Conrad K Sangma oprake on·aha.

Tom·anio dingtang dingtang sessionrangko ong·ate, dingtang dingtang a·barango sea-jotani bidingo golporime mesokaha.

Skanggipa sessionko Profile of Garo Literature ine done Fameline K Marak-ko Basan R Marak golpodilaha.

Gnigipa session-o poedo segipa Rhinkle M Marak aro Dorothy R Marak-ko Jacqueline R Marak golpodilaha. Poedoko sena somoi nangania poedoni rokomni kri aro gisikona sokbaani kri ong·bata ine Rhinkle M Marak aganaha. Gisik ka·tongo ong·aniko gipin bewalchi parakna man·jaon poedoni bewalo man·aniko Dorothy aganaha.

Gittamgipa sessiono adita sak poetrang an·tangtangni sea poedoko mingprak mingangaha. Yanpolumi Mangsang Sangma cultureni bidingo Englishchi me·subee poedo seako mingaha. Thomas Mrong Marak A·chik matgrikni bidingo me·subea kattarangchi poedo minge on·aha.

Sengsime A Sangma me·gong bibalni karitango balani gimin poedo mingaton, darangan karitangosa balgaoani gimin sakgipinko chonnikjana simsakna nanga ine skidapaniko on·angaha. Jakmatchi M Sangma ka·tongni brangengani bidingo aro Nambebalche Sangma me·gong bibalni bidingo me·subegipa poedoko mingangaha.

Sundaystar Momin, somoide mandeni jakkalna changaniosa pangchakaniko, Robar Sangma sin·karini balwani bidingo, aro bon·kame Dorothy R Marak me·gong bibal aro bipangni bidingo chanchibewalaniko naatgipa poedoko mingaha.

Brigipa session-o golpo serakgipa Mukthi R Marak aro sakgipin ki·tap serakgipa Chenggan A Sangmako ALSni Secrerary Crystal Cornelious D Marak gisik a·ning bite golpodilaha. Chonmitingonin poraina, golpo aganko knatimna aro jawilwat nina namnikbeaniko Mukthi aganaha. Khalsin aro Sonatchi, Chigitchakgreni Nokma novelrang uko sea-jotanina gisik nangataha, aro uni golporangko Chimik magazine-o gataton jinmana mesokatna cholko man·chengaha ineba ua aganaha. Sorkario kam ka·gipa ong·e sea-jotanina basako somoi man·enga ine sing·on, “Salni bakkode nokdangna on·a, walni bakko sea-jotanina jakkala, aro somoikode cha·una nanga” ine Mukthi aganchakaha.

A·chikrangni dakbewal ka·bewalrangni bidingo mongsonggipa lekka segipa Chenggan A Sangma, uko sena-jotna didichenggiparangni bidingo aganaha. Middle aro high schoolo skigiparangonin a·bachenge, A·chikrangni minga ring·anirangko chimonge ki·tap sechina uko didiaha. Oral literatureko seangkuchina Lindrid D Shira aro Dr Milton S Sangmaba uko didiaha ine aganaha. Pagitchamni Ku·ringa part 1 aro 2na A·chik a·songni dingtang dingtang biaprangoni chimonga baksanaba Bangladesho minga ring·anirangko ra·aha ine Chenggan aganaha.

Jolni kri agangipa Garo ku·bipekrangko see ripingna nanganiko Chenggan aganaha. Sea-jotania chasongtango ong·aniko rakkirikani ong·a; 1897 bilsio banggria dal·gipa ong·anikon Banggria poedoko poraiesa u·iaha ine Mukthi aganskaaha.

Bongagipa session-o Nokpante band-ni Mikhail Ch Marak-ko Barbara S Sangma golpodilaha. Uni git tarianiranga literatureni gadangon ong·a ine nike uko tom·aniona okamaha. Bi·saonin mande gitchamrangni golpo agananirangko knatimna namnikaniko, Melkey Chisim aro Sembertush gita dakgipa manderangming golporonge folklorena gisik nanganiko Mikhail aganaha. Uni git bikotani bewalranga Garo folkloreko u·ie ra·chengako mesoka ine tom·anio dongpagiparang uko mittele aro de·kadange golpotokaha.

Bon·kamgipa sessiono, Bangladeshoni sokbagipa James Kalyan Ritchil, Snigdha Thigidhi aro Choity Mankhin-ko Dokatchi Ch Marak golpodilaha. Bangladesho ku·tangko ripingna ka·oksiengon bang·a ja·gitdotanirangko uamang aganaha. Dongwilwal gimikon gipin ku·sikosa aganna nanganiko, bang·a Garo nokdangrangon Bengali ku·sikkosa jakkalna nangani gimin skimna nangenganiko uamang parakaha. Uamangni Garochi aro Bengalichiba git ring·e manderangko ka·srokataha.
“Wanchi toke rikmatchu gane dongbone,
Dama doke aduri sike name dongbone.”

Iakoba poraie nina man·gen: Rel garirangko ra·baani bidingo chanchirimna Jaintia Hills-o tom·aniko ong·atgen ine MLA paraka