Tura, July 26: Kate dongenggipa Tura-ni BJP MDC Bernard N Marak (Rimpu)-ko rim•na gita Meghalaya Police, a•song gimikni police station-rangonan u•iatani ja•man Mongolbar attamo Uttar Pradesh (UP) a•dokni police-rang uko Hapur a•jaoniko rim•na man•aha.
Koborko on•ani gitade, Tura-ni BJP MDC aro BJP-ni Meghalaya state vice president Bernard Marak-ko UP a•doko rim•ani ja•man Meghalaya Police-na kobor on•ataha aro da•o uko Tura-ona rimbapilna gita a•dokni Police-rang, Uttar Pradesh a•dokona re•chakatangaha.
An•tangko bame on•china u•iatani ja•manoba Tura-ni MDC, bame on•gija katchipe dongengani gimin aro ia bilsini February jao me•chik bi•sa saksako uni bagano drae til•ekgipani bidingo District Sessions Court-ni gita uni kosako non-bailable arrest warrant-ko on•ahani gimin police-rang, uko jeo nikgenchimoba rim•china gita a•song gimikni police station-rangna u•iataniko on•atahachim.
Me•chik bi•sako Rimpu Bagan-o drae til•ekgipa case-o pangchake re•anggipa Sukrobar walo police-rang, BJP MDC-ni baganko chadrapeaha aro sak 69 manderangko rim•e sakdok bi•sarangko jokatna man•ahachim.
Rimpu Bagan-ko police-rangni chadrapeanio, niam gri palenggipa churang baksana condom aro ma•manti bosturangkoba man•ahachim.
