Tura, Jun 30: Tura songjinmako re·roroe nigenchimode, bang·bata biaprangon Closed-Circuit Television (CCTV) camera-rangko dona ine nikna man·a indiba ia CCTV camera-rangoni bang·batan da·o kam ka·jahani gimin ia camera-rangko donanichi maming namgnirang dongjaenga.
Ia CCTV camera-rangko songjinmarango nirikkina aro gari gorarangni re·ruraanirangko nirokna gita dona aro iandakgipa CCTV camera-rangoniko nien police-rang, ong·gija dakgipa manderangkoba rim·naba man·engachim.
Indake ong·genchimoba Tura songjinmao ia CCTV camera-rangko donanichi maming namgnirangko man·jaenga maina ia camera-rangoni 98 percent-de nosto ong·tokaha aro kam ka·jaha.
Biap damchikkingoni damsa ba damgni biaprangosan camera-rang kam ka·kuenga indiba gipinrangde kam ka·tokjaha aro tarichipgija dontokaienga.
Niatgenchimode, Tura-ni Araimile bibrao CCTV camera-na krong ge·sako ramasamo songe donako nikna man·gen aro Holycross bibraoba apsan daken krong songe donako nikna man·a indiba iano CCTV camera-rangan da·o dongjaha.
Tura songjinmao CCTV camera-ko dongipa biaprangara, Tura Bazar, Hawakhana junction, Tura Police Station junction, CS Office junction Babupara, AOC petrol pump junction, Tetengkol junction, Araimile junction, Holycross junction, Ringre junction aro Chandmari junction ong·achim indiba ia biaprangoni bang·bataon da·o CCTV camera-rang kam ka·tokjae namgniko man·jaengaha.
Tura songjinmao CCTV camera-rang kam ka·jaengani a·selan gari gora cha·uani, dokkanrangoniko cha·uani, gari a·sel ong·ani aro uandakgipa dingtang dingtang kamrango police-rang dos dakgipa manderangko sandianio maming dakchakanirangko man·jaenga.
Adita salrangna skangsan Tura songjinmao gari, motorcycle, gari battery, tire aro uandakgipa bosturangko cha·ue katanirangko bang·en knasona man·aha. Cha·ugipa bosturang mitamkode police-rang man·pilaha indiba da·ona kingkingan gari cha·uaniko chu·gimik champengna man·kujaengachim. 2023 bilsini bon·angachibara, Tura-ni Chitoktak jolo chu peke gari salgipa mande saksa, DSP-ni gadango ong·gipa officer saksako uni kamo ong·jamiting somoio kragija dake dokaha. Indake ong·genchimoba, Chandmari-o dongipa CCTV camera kam ka·jahani a·selan police-rang, dos dakgipa mandeko rim·na man·chipjaha.
2020 bilsiosan Meghalaya a·dokni Director General of Police (DGP)-ni office-oni dingtangmancha CCTV-ni spare part-rangko brena gita quotation-rangko on·china advertisement ba u·iataniko on·ahachim indiba da·alona kingkingan Tura songjinmao CCTV camera-rang kam ka·jaengani gimin CCTV camera-ni spare part-rangko brena tik ka·aniara chu·sokama chu·sokjaha ma·sichipkujaenga.
Ia CCTV camera-rangko 2013 bilsio India sorkarini Science & Technology department-ni ning·o donggipa North East Centre for Technology Application & Reach (NECTAR), Shillong aro Tura songjinmarango chate on·ahachim.
Na·simang ia video-koba nina man·gen:
Na·simang iakoba poraina man·gen: Ladakh-o rang•san chi dal•changbaani a•sel T-72 tank-ko man•pakanganio sak 5 Indian Army-rang sia
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
